財金冒險號：
2017年N大驚奇（二）
■歐元區債務危機今年或重燃。 資料圖片
上周估計，今年頭兩大驚奇係美元4月份見頂及黃金反撲，今日講埋餘下四個。
（1）美國十年債息升穿3厘。美國零息加QE已經八年，通脹一直唔達標，但現時撞正油價大幅反彈，今年上半年通脹會升得幾急。就算單計核心
通脹都不得了，因為美國已算全民就業，薪金升幅會加快，從而推高物價。通脹升，債息就跟住升，十年期國債孳息嘅超長期降軌大約喺2.5厘，確認升穿就會升勢加劇，直指3厘。
（2）德國連環恐襲，兩年前豪言「接收難民無上限」的總理默克爾夫人競逐連任失敗，右派政黨上台。
（3）歐元區債務危機重燃。歐央行最近延長咗QE買債期限，但減咗每月買債金額，部署逐步退市。德國最新通脹急升至1.7%，對惡性通脹極有戒心嘅德國佬，可能向歐央行施壓，加快收水，債務對GDP比率仍高於100%的「歐豬國」，到時再成狙擊對象，重演2012年的震盪。
（4）藍籌股風水輪流轉。恒指成份股之中，澳門賭股係去年股王，市場炒定行業復蘇，但博彩收入唔會係V型反彈。人民幣貶值，大陸政府只會不斷出手阻止資金外流，肯定再有不利濠賭嘅政策。反而上年最衰嘅聯想（992）省減成本同整合Motorola措施將開始見效，只要業績稍有驚喜，股價唔難翻身。
笑笑生
mailto:sneeringman@gmail.com
本欄逢周四刊出
笑笑生
財金冒險號 - 笑笑生 舊文
來源 source: http://hk.apple.nextmedia.com
