操盤手劄記：
騰訊小程序大茶飯
■微信將推出「小程序」，可促使用戶集中喺微信用App。 資料圖片
踏入2017年，環球股市喺首個交易日都紅盤高收。不過，港股昨日先行回吐，收22134，跌15點，主板成交連續兩日都係500億元左右，反映投資者仍慎審。後市要睇中外大勢，特朗普本月20日
就任美國總統，中美關係陰霾密佈，遏制港股上升動力。
特朗普主義講白啲就係自私主義，喺國際層面就係貿易保護主義。特朗普係生意人，慣於喺任何關係中搵槓桿，早前就以台灣為槓桿點，打「台灣牌」向中國施壓；佢亦擅長談判，為求達成交易，唔會一步不讓。中國對美順差問題，可望經談判解決，貿易戰未必開打。
美國進入加息周期，喺美元強勢下，人民幣陰乾式下跌，基本上已可冚牌，債務危機或一觸即發。人幣兌美元舊年大幅貶值6.4%，今年隨時跌穿7算，外儲亦隨時跌穿3萬億美元。為咗保滙率、保外儲，阿爺收緊境內個人購滙申報程序，嚴禁境外買保險、買樓、炒股。
雖然滬深港通唔受影響，但港股通淨流入並無即時大增，大媽愛股騰訊（700）喺港股通則有吸資。事實上，騰訊確係值得留意：一、廣告方面，騰訊新聞、騰訊視頻、微信朋友圈、微信公眾賬號等廣告收入持續增長；二、手機遊戲方面，舊年6月收購Supercell，成為增長引擎；三、微信將於本月9日推出「小程序」。
小程序嘅功能可促使用戶集中喺微信用App，毋須去App Store搵App，掃二維碼即可取得資訊或服務。簡言之，係無App嘅App。一來，可成為企業由線下走到線上嘅捷徑；二來，好似蘋果嘅App Store同Apple ID咁，可將微信變成WeChat OS，與蘋果嘅iOS、Google嘅Android鼎足而立。微信公眾號超過2,000萬，隨著小程序問世，勢必進一步擴大版圖。騰訊將於3月22日派成績表，據彭博綜合券商預測，料按年多賺35%。該股舊年9月23日喺220.8元見頂，回調三個月後，12月23日喺179.6元見底回升，呢兩日見回吐，昨收189元，可候180元附近吸納。
割柑人
本欄逢周四刊出
割柑人
操盤手札記 - 割柑人 舊文
來源 source: http://hk.apple.nextmedia.com
