追捧人仔跌受惠股
2017年01月05日
新年環球投資市場開局，中、美、歐的製造業採購經理指數都好過預期，好多人睇好美國經濟，美元向上，美股亦升。咁問題就嚟啦，美股升支持港股，美元升人仔受壓隊低港股，兩度力中和左，港股就唔生唔死。
短期嚟講，阿爺點樣穩定人仔匯價係市場焦點，要等呢樣
嘢過左去，個市先會明朗啲。內地嚴控資本外流，早前煞停居民來港「刷卡」買投資性保險，最新更有內地銀行不肯兌付這些投資保單的收益支票，《深圳商報》報道，有內地人近日拿本港保險公司簽發的投資收益支票到中國銀行兌換現金，但銀行拒絕兌付。
報道引述銀行解釋，只有境外財產、健康和意外傷害的消費保險，相關理賠支票可以正常兌付。境外壽險保單、保單分紅和投資收益等支票就不能入帳，原因是國家不支持購買境外保險，目前國家資本帳戶尚未開放。阿爺控資金外流出盡法寶，龍頭保險股友邦(1299) 對不承兌收益支票的消息反應唔算大啦，只係跌左0.46%收報43.55元，執番身彩，可以話大家都預左。
港交所借勢推人仔期權
除左保單外，彭博又引述消息指，中國官方正通過模型壓力測試和調研，對今年人民幣匯率和資本外流情況進行預估和研判，同時相應準備風險應急預案。消息指，監管部門已鼓勵部份國企對經常項下外匯結匯，預案就包括如有需要，當局將考慮對國有企業重新實行經常項下，以臨時管理措施方式按一定百分比強制結匯。
內地放出幾手準備嘅消息，相信係要向炒家發出訊息，已經準備左重型炸彈準備肉搏，更講到話減持美債，有直搗黃龍嘅意思，以O依家內地手持美債嘅數量，若然大力沽售，隨時扯高美債債息，對美國實體經濟帶嚟衝擊，美元自然唔會咁強，變相就減少左人仔壓力，如果唔想出現咁情況，美國政府屆時可能就要出手。
人仔O依家波動大左，港交所(388) 就宣佈計劃推出人民幣貨幣期權，若市場準備就緒，美元兌離岸人民幣嘅合約可望於2017年第一季開始交易。據交易所講，去年佢地做嘅美元兌人民幣(香港)期貨總成交量為538594張合約，合約價值等如540億美元或人民幣3760億元，與前一年相比增長105%。未平倉合約於2016年12月30日創下45,635張合約之新紀錄，佔全球美元兌人民幣(香港)期貨未平倉合約總和約三分之二。
人民幣衍生產品市場的期交所參與者數目亦見增加，提供人民幣期貨買賣服務的期交所參與者於2016年新增13名，總數增至103名。雖然借於人仔波動推出新產品，但佢股價仍軟番啲報收182.6元，跌左1.7元。
舜宇光學獲資金追捧
由於人仔匯價仍然唔穩定，港股雖然初段隨外圍市況造好，一度升穿20天線，最多升78點，但午後牛皮偏軟，全日恒指收報22134點，跌15點；國企指數收報9440點，下滑18點，成交金額525億元。藍籌股中獲瑞銀護航的神華(1088) ，升3.3%報15.12元，鐵路及鐵路設備股繼續向好，中鐵建(1186) 收升2.39%報10.28元；中鐵(390) 升2.68%收報6.51元。
喺匯價壓力下，資金避開人仔敏感股，流入對匯價唔敏感嘅工業股，大摩就唱好舜宇光學(2382) ，令佢大漲7.5%報收36.6元。主力做鏡頭嘅舜宇光學，去年係基金愛股，表現已經跑贏大市，新一年開波，基金似乎繼續看好公司嘅前景，資金繼續流入追捧。舜宇嘅生意有科技含量，生產成本受惠於美元強勢之餘，相信受中美貿易摩擦嘅威脅比其他工業股低，所以雖然預期市盈率都有成30倍，都仲係跌市爆上。
陸羽仁
金融High Tea 舊文
來源 source: http://hdfin.stheadline.com
