【不問價追】多謝你塞錢落我袋（小炒王梁心欣）（第106期）
2017-1-8 15:00:46
去年年尾收到一份唔錯嘅禮物，佢唔係一份實體嘅禮物，而係一次有趣的對話。做投資其實係一種幾孤獨嘅工作，因為你買咗一隻股份，你會因為對佢信任而堅持，但路途上會有其他人表示離棄、嫌棄甚
至恥笑你，所以投資路一直對我來講都係比較孤獨。但當然身邊不乏戰友啦，有時分享下炒股資訊甚至自己出嘅研究報告其實都係一大樂事也。
機緣巧合底下撞見一位基金經理，佢一眼認唔出我，但當我介紹自己嘅時候佢就話有睇過我嘅分析兼且認為小炒王對某隻股票分析預測非常之準確，因為佢持有相同嘅意見，結果我哋兩個展開一個長達60分鐘嘅對話。
佢同意我對安寧（00128.HK）嘅睇法，亦都戥啲股民唔抵，認為現價相對其實質資產低咗好多，佢認為我睇啲咁冷門嘅股份係相當之奇特。跟手我話埋比佢聽其實我都有睇埋博富臨（00225.HK）仲特登走去灣仔親身睇埋某商業大廈外觀同埋內櫳，講白啲，真係走去實地視察，佢話無諗過坊間做股評的人會咁認真，真係睇啲傳統老企業的物業。我話：去圓玄學院時仲可以睇埋屬於安寧的顯達俱樂部，點知佢話佢沒有掃墓的習慣。
當我以為自己唔馬虎之際，佢竟然話我知，佢做一隻股份研究可以做兩、三年，仲將整個過程一五一十講我知。聽完之後我發覺我哋要跟蹤人其實唔使請私家偵探，請做股票研究分析嘅人員其實都一樣。佢話佢為了研究一隻股份，連人哋家族有幾多人、住邊度都知道曬，兼且連家族成員嘅性格佢都知得一清二楚。邊個為咗利益會賣股，邊個企硬唔出售股份佢都瞭如指掌。即使連其他小股東嘅背景都已經背得瑯瑯上口。一間公司有幾多資產不在話下，究竟會唔會拆骨、會唔會賣，同邊個話事人可以傾到計，佢簡直如數家珍，聽到我都呆咗，仲要呢隻股份我諗都冇諗過，以為係「死股」，畀佢講完先知係寶藏。不過到呢一刻為止，我都仲未親自買入，因為未有時間自己做分析。
呢一個鐘，大家都講到興奮，對自己熟悉嘅股票竟然有人分享經歷，自然覺得好開心。對話過後，我仲回味咗一陣，覺得佢嘅做法好聰明，值得借鏡，亦因此覺得自己所做嘅一切好卑微，所以小炒王決定，2017年會再繼續深入股份的深深處，找尋亮點，亦對願意及認真做功課的人非常敬佩。期待下一次的對話。
2017年，點都放低一個股票冧巴，我於$68水平增持了電能（00006.HK）作為中長線持有之用。
不問價追 - 小炒王梁心欣 舊文
來源 source: http://www.winmoney.hk
