異動空間：炒股人點贏電腦
■AlphaGo在圍棋上令各國大師全軍盡墨。 資料圖片
人腦敵不過電腦，以圍棋AlphaGo為例，最新已60連勝，各國大師全軍盡墨。全人類輸畀電腦，主要在三方面：第一，人會攰、會失誤，電腦演算出錯率極低，只要玩得耐，電腦贏硬；第二，人腦記憶有限，也會記錯，但電
腦所輸入的棋譜，是無數前人的心血結晶，葉問都係一打十，家陣電腦用幾萬、幾十萬人的智慧圍毆你一個，無得輸；第三，也是最重要的，就係人有情緒起伏，也會受經驗影響判斷，一旦行錯一步棋，心裏不高興，急住要反勝，電腦自然有機可乘；相反電腦無感情，每步都係理性計算，大師都偷唔到雞。
圍棋跟股票有何關係？經歷多月捱打後，投資者萬念俱灰之際，港股過去七日彈升千點，就算當上落市去玩，新趨勢無疑正在形成，理性上應加倉而非減倉。但假設閣下成手蟹貨，如今有機會鬆綁甩身，基於內心仍在恐懼，好自然會唔理新趨勢，閃咗再算。就算是趁低撈貨的勇者，頂多都係搶雞糊。這是人之常情，但也是令普遍投資者「贏就得幾千，輸就應到癲」的原因。如今電腦盤快如閃電，偷雞難度十粒星，學習以慢打快，多思考慎出手，才有望以弱勝強，在股海繼續搵食。
魏力
http://www.fb.com/2012jason
本欄逢周一、五刊出
魏力
異動空間 - 魏力 舊文
來源 source: http://hk.apple.nextmedia.com
