智取大市：
吸血殭屍賣樓大法
■啟德1號2期部份單位實呎包埋垃圾房。 資料圖片
喺吸血殭屍面前，有一個媽媽，一個小朋友，殭屍撲向小朋友，媽媽自然會去擋。對殭屍嚟講，呢種係吸最多血嘅方法。啟德1號2期部份單位實呎包埋垃圾房，推出單位平均每呎要賣成萬七，咁都排曬隊。
唧牙膏賣樓，為嘅係博幾
百萬人中最瘋癲嘅一百幾十組人入場，賣完後，過一排又會有最不理性嘅一百幾十組人出現，需求綿綿不絕，原因係香港話大唔大、話細唔細，但係有過百萬對父母，有啲人比較有錢、比較錫自己骨肉，總會去到一個時間點，見到仔女開始有自住需要，自然撲向吸血殭屍。慈父買樓畀子女嘅故事，與其用不理性去形容，倒不如用「骨肉之情」四個字去解釋，已經盡在不言中，無人唔明。
父母本身唔係儍，都覺得樓貴，但為咗長大成人嘅心肝寶貝能夠安居樂業，尤其FF埋第二時弄孫之樂，一時三刻睇唔到樓價幾多錢、包唔包垃圾房，只要買得起，不問價又何妨。發展商呢一著，就係睇中「父慈子孝」呢個傳統道德倫理思想嘅盲點，博父母盲目瞓身買貴樓畀子女。呢種做法，同牟利機構扮做慈善，搵人捐獻，再將九成捐獻放落自己口袋，冇乜分別。
晉佳
http://www.fb.com/advanceguy1
本欄逢周一、三、五刊出
晉佳
智取大市 - 晉佳 舊文
來源 source: http://hk.apple.nextmedia.com
