【股場解密】路訊通猛人坐鎮有排炒（歐陽風）（FEB 03）
2017-2-2 22:24:25
路訊通（00888.HK）自去年12月以來股價長升長有，這間新地（00016.HK）旗下載通（00062.HK）再旗下的巴士多媒體業務，近年業績平平，股價亦跌了好幾年，不過近排「的起心
肝」將公司業務重組，於是重獲市場注視。
其中最哄動消息是月前獲資深傳媒人羅燦加盟，任路訊通董事總經理，雖然月薪20萬不算特別「高薪」，但未返工已先袋60萬簽約費，可見集團對公司對羅燦相當看重。
同期路訊通母公司載通亦委任高豐為替任董事，此君曾任職大摩及私募基金KKR，簡單來說就是專門做刁的i-banker，搵高豐入去載通，明顯就是鋪路做刁，是收購？轉型？還是其他併購呢？假如只是賣盤，其實由最上層的新地管理層去做就得，因此相信今次搵咁多勁人入去，係有真正大生意去做，亦都相信同國內大企業有關。
再睇兩間公司近年發展，新地近年最猛料董事之一，2003年加盟新地的馮玉麟早前獲指派擔任「非地產相關的投資組合」行政總裁，過去2年已打入旗下公司如載通、路訊通、數碼通（00315.HK）、新意網（08008.HK）等董事局，看來以上的委任是由馮氏一手搭路。
現年47歲的馮玉麟，中學讀聖保羅男女，大學畢業於牛津大學歷史系，持有哈佛大學歷史及東亞語言博士學位，曾出任哈佛大學及布朗（Brown）大學導師及客席助理教授，授課中國歷史與政治（深諳權術）。他於1997年加入麥肯錫，擔任基礎設施業務聯席領袖以及首名香港華人擔任麥肯錫資深董事，且公職多多。
以上陣容，加上路訊通市值7億幾有一半係現金，買佢陣容都抵哂，睇落仲有排去。
#股場解密 #歐陽風
作者簡介：擅長鑽研公司通告與財務報表，發掘細價股、財技股及增長股
股場解密 - 歐陽風 舊文
來源 source: http://www.winmoney.hk
