金融High Tea 2017年2月3日
復牌股炒作送甜品
2017年02月03日
美國聯儲局會議，決定維持利率不變，焦點係局方點樣形容經濟，會唔會繼續放鷹？結果儲局發表聲明取態算比較溫和，對好好的經濟形勢輕描淡寫，鴿味好濃，利率期貨交易顯示，3月聯儲局加息的機會，在聯儲局開會後由29%跌至22%，亦令美股止住跌勢。
聯儲局留有一手
聯儲局呢個月唔加息已經係預期之內，關鍵睇會後聲明點講。美國復甦持續，而且就業處於史低位，理論上儲局可以鷹番啲，但會後聲明無咁講，原因可能係佢之前已形成左市場對今年加息較密嘅預期，唔再放鷹係避免落藥太重，同埋留番小小彈性畀自己；另一個原因係佢唔想同作風強硬嘅總統特朗普關係搞得太僵，總統講明唔想美元太強，儲局如果急急放鷹話準備加息，咁等同公然唱反調，耶倫係老雀唔係新手，個心點諗都好，未到加息之時，都無必要咁早吹風，時時同總統硬碰啫。
聯儲局鴿鴿地，恒指曾升120點，惟高見23439點後無以為繼，一度跌187點，低見23131點，於10天線(23116點)見支持，其後跌幅稍為收窄，收報23184點，跌133點；國企指數收報9696點，跌60點，成交金額493億元。
藍籌股普遍下跌，友邦(1299) 、建行(939) 及工行(1398) 領跌，三股合共拖低恒指45點跌幅，友邦跌1.46%報47.25元；建行走低0.52%收報5.77元；工行收跌0.84%報4.73元；滙控(005) 跌0.15%報收66.25元。收市後披露卡塔爾投資局已申報，於1月27日減持農行(1288) 383.7萬股H股，每股平均價3.26元，持H股降至11.99%，實際持股降至36.86億股H股。
大市偏軟，但概念板塊自己有自己嘅方向。近期紙價回升，市場憧憬紙業股盈利將續陸改善，利好部份紙業股表現，優源控股(2268) 大漲6.6%收報2.11元；理文造紙(2314) 走高2%報7.12元；玖龍紙業(2689) 升2.5%報9.38元；森信紙業(731) 、陽光紙業(2002) 都升逾1%。
港股喺新年兩個交易日回軟，但市況唔算太差，呢排輪到黃金同鋼鐵股有得炒。金礦股主要跟住市場對利率同美元前景走，鋼鐵股呢一輪炒風持續咁耐，主要係中美兩個大國想挺住經濟，都話要搞吓基建，好似特朗普想在墨西哥邊境起條「特朗普長城」，就要80至120億美元，會拉動水泥鋼鐵需求。
中國東方發市當三年
鋼鐵股自從兩、三年前炒完量寬，股價大幅下插，O依家由茶渣價反彈，但呢類股份良莠不齊，加上行業循環性好大，好多都係適合炒而唔係適合揸，好似啱啱復牌嘅中國東方(581) ，呢幾日復牌後就差不多翻左一翻。
中國東方原先主業喺內地從事生產及銷售鋼鐵產品，另外有做地產同其他投資，公司一度出現鉅虧，2014年公司因為股東因為持股量爭拗停左牌，一度搞到差啲要除牌，後來兩個股東講掂數，同意配股出街增加市場流通量。去年上半年因為其他業務收入大增盈利急升，但公司已表明下半年唔會有咁好景。公司由於重組關係，流通量不足25%，早前要安排配售，結果成功以1.3元成功配股，價錢比停牌前高一截，所以停左牌咁耐，有關人等一復牌就當三年，猛炒一輪補番數。由於內地都有意增加番多啲投資，令佢嘅本業有機會改善，加添左概念。不過，講到底呢類重組股，最重要仲係市場貨源嚴重缺乏，所以股價一撩就爆上，鋼鐵業務嘅憧憬都係附送嘅炒作甜品啫。
陸羽仁
金融High Tea 舊文
來源 source: http://hdfin.stheadline.com
