財路：協合新能源平到痹
■內地大力發展新能源，協合新能源料受惠國策。 資料圖片
協合新能源（182）食住環保國策，其中一瓣「建設－出售」潔能設備生意，可以賺取更高利錢，成績單keep住靚仔，預測PE係城中至平嘅選擇之一，有得諗！
協合主打風電營運、維修，同「再能源諮詢、設計、設備成套供應同
建設」（EPC）三大瓣數。呢期改變策略，縮減EPC規模，加大「建成－出售」比重，兼見到成績。啱上年尾，協合宣佈出售太陽能發電場項目，估計獲收益1.95億港元。呢個收益，已經等於2016年上半年盈利2.78億元70%比重。
發改委同國家能源局啱上年尾電力發展十三五規劃，講明要keep住大力發展新能源。到2020年，全國風電裝機達到2.1億千瓦以上、太陽能發電裝機達到1.1億千瓦以上。睇到亦諗到係，環保國策keep on，事實亦有咁必要，協合呢個策略改變，食正環保水，而通過建成出售，亦獲取更多收益，掂過碌蔗！
場內專業評估，協合今明兩年EPS9仙同0.117元，預測PE得4.8倍同3.6倍。場內龍源（916）今明兩年預測PE10.5倍同9倍PE，金風科技（2208）亦講緊8倍樓上。又比起京能（579，明年預測PE5.6倍），同華電褔新（816，明年預測PE4.7倍），協合預測PE亦都仲要再平！
協合現價0.425元，潛喺近三年橫行底，較2013年引入上邊華電褔新入股價0.43元更低；比起大股東China Wind Power2015年時，增持5億股每股成本價0.6元，潛水近30%，殘到痹！
數咁計，協合單係升到上呢個大股東增持價，現價講緊要升逾40%，到時目標價對應今年預測PE，先得5倍，啱追到PE最近磅嘅華電褔新，兼未有耐上到金風同龍源預測PE水位。
錢雋
細價股專家
本欄逢周二刊出
錢雋
財路 - 錢雋 舊文
來源 source: http://hk.apple.nextmedia.com
