財經評論：759老闆經營哲學
■阿信屋的老闆林偉駿話唔係自己「太多心」，只是當時錯估形勢「行得快咗」。 資料圖片
經營阿信屋的CEC國際（759）主席林偉駿接受訪問，話唔係自己「太多心」，只是當時錯估形勢「行得快咗、開頭太順利」。的確阿信屋的一台戲獲得許多港人讚好，也令我被友人罵足幾年，為何？只
因曾幾何時阿信屋代表對抗地產、超市霸權，不看好的人猶如與民為敵。
但阿信屋由幾間舖仔變幾百間分店的都市傳奇，早在幾年前已然變色。事關公司無章法地由賣零食，跨足到老人產品、麵包、化妝品、雲吞麵等等都開上。記得當年阿信屋的聲勢浩大，傳媒都對其趨之若鶩。當時我亦有到阿信屋走了一趟，問到林偉駿為何開麵檔？他指單純覺得對方的麵好食，執笠可惜，便招攬開新麵檔，仲話新店魚蛋、貢丸等用番阿信屋嘅貨。
此事亦為阿信屋再賺得小店救星的名號，朋友都話，升鬥市民最緊要係「我唔想畀錢百x、惠x賺」。問林生如何決定做邊瓣？林生竟笑笑口話打開報紙邊間執笠做邊間，真㗎，冇得諗咁多。再問多幾句，林生就封口指，總之我一股都冇沽，唔係炒股的人。呢幾句聽落好霸氣，但實際聽得我一額汗。做生意要計數，阿信屋的零售生意利潤好奀，在香港做生意唔易，租貴、人工貴，成本貴，要幫補一籮未上軌道，甚至完全無協同效益、無規模效應的新業務，只是百上加斤，難道阿信屋隻隻手都能點石成金？同埋你說不在乎股價？上得市，誰信？
最終該次訪問無出到街，但事隔兩年多，阿信屋終於講整合業務，但依然無方向，就好似話要將759 Kawaii分店結束改裝，轉頭又話唔執曬……到底點？我又唔係林生心裏條蟲，鬼知咩。
記者：方楚茵
財經評論 舊文
來源 source: http://hk.apple.nextmedia.com
