經濟客艙 - Captain Cool 2017年2月27日
經濟客艙：
日式Happy Friday
■日本HMV於呢個長周末，推出咗折扣優惠。
日本政府前日推行Premium Friday計劃，參與企業於每月最後一個星期五，讓員工下午3點放工，鼓勵企業員工於長周末，外出消費，食飯、睇戲或者來個長周末嘅小旅行，消費振興經濟。
呢個Premium Friday係日本最近熱烈討論題目，初步參與計劃只有大型日本大企業，例如軟銀、三得利、豐田同大和工業等等。大企業配合政府推動，允許員工當日放有薪假期外，部份企業例如軟銀派發額外獎金，例如每月發放額外1萬日圓；或如日本車廠豐田和日產等，讓員工「自己揀」邊日早放，彈性處理假期。大型百貨、連鎖食肆同商戶，先後推出咗不同優惠。日本HMV於呢個長周末，推出咗折扣優惠；餐廳同居酒屋都推出咗Premium Friday套餐。
香港打工仔「隔住個芒」好葡萄，但現實邊有咁理想，或者唔好係向好處想。日本有調查，訪問1,600名日本上班族，得3.9%員工知道計劃。另外，有日本電視台調查發現，東京同大家阪嘅公司得悉計劃，但以外地方嘅中小企直情唔期待。最搞笑嘅調查係，日本員工就算知道企業參與提早放工計劃，多數人寧願選擇留家休息或者瞓覺，外出消費同去旅行佔小數。
如果真係有個長周末，《日經》調查發現，日本打工仔最想去嘅地方係台灣，其次係去北海道，香港同韓國係次選。香港嘅旅遊同零售，都可以諗嚇計吸引日本客訪港，總好過守株待兔等運到。
Captain Cool
https://www.facebook.com/seeforcaptain/
本欄逢周一刊出
Captain Cool
經濟客艙 - Captain Cool 舊文
來源 source: http://hk.apple.nextmedia.com
