浸浸回頭浪
2017年02月01日
年春節長假期，港股遲至大年初五先復市，期間美國總統特朗普上任，已經點咗幾把火，搞到美股周一曾經大插222點，最後反彈，仍跌122點，插返落去20000點樓下，香港停市無跟跌，今日先睇吓昨晚美股係咪可以企番穩，令港股可以跌少啲。
特朗普上場唔想被人
笑佢走數，先簽行政命令要喺墨西哥邊境起圍牆，仲話要響墨西哥入口貨收稅嚟畀建築費。調轉頭佢又叫停7個伊斯蘭國家嘅移民入境，仲為咗執行政策，炒咗兩個入境部門嘅高官，搞到回教國家天怒人怨。
低位買大股密密啄
喺特朗普接連出招之後，科技巨頭率先投訴會影響佢地非美籍員工入境，投資市場原先對特朗普上埸嘅樂觀情緒即刻降咗溫，怕佢搞出的問題比解決的多。美元腳軟、金價回升，美股急跌，呢個可以叫做「特朗普回調」現象。
新總統未上場，市場憧憬佢大搞基建，刺激經濟，美股大炒「特朗普概念」，不過世事嘅嘢，從來都係說易行難，特朗普講就天下無敵，得唔得真係要試過先知，O依家佢上場，借啲意回調得深啲都唔出奇。
另外貿易戰又開始開打，美國國際貿易委員會在1月30日(周一)作出終裁，指從中國進口的大型洗衣機對美國相關產業造成了實質損害，裁定將正式要求海關對此類產品徵收反傾銷稅。根據美國商務部去年12月終裁確定的幅度，美國將對中國廠商徵收32.12%至52.51%的反傾銷稅。
美國先郁洗衣機，未來可能仲有其他貨品排隊等制栽。美國調查中國貨係唔係傾銷，雖然唔係乜嘢新政策，但見到新總統咁作風，處理貿易問題短期都會揸硬啲。睇番對股市影響，呢個消息相信對內地嘅家電股同出口股份都有壓力。
另一邊，我覺得美股向下炒吓「特朗普發惡」呢一浪，對中港股市影響未必咁壞。新總統上任三把火，四圍出擊，首先就搞到美金弱咗，呢樣嘢估計唔會嚇到呢個狂人，因為佢係老式生意人，認為美金弱有利做生意。
肖建華系炒股有壓力
美金無咁強，人民幣受嘅壓力無咁大，另外對港元資產價格亦有正面影響。所以個別行業同個股可能會受到一浸浸「特朗普惡浪」嘅衝擊，但大圍因素唔係全面利淡，只要美元回吐就OK啦。雞年股市唔似係單邊升市，但港股O依家唔係咁貴，都唔係咁易出現跌個不停的單邊跌市，投資者等回吐時低位買啲大股，好似雞仔咁密密啄，都仲有機會搵到啲食。
最後，講講外電日前爆料，話內地金融大鱷肖建華被內地抓捕，消息出街後，當事人發表聲明，話自己喺國外養緊病，不存在被綁架回內地的情況，仲話很快與傳媒見面。
不過，香港警方就證實，年初一接獲一宗有關在港內地人士的「求警協助」個案，其後事主家人通知警方，指事主已致電報平安，並在周日要求銷案。
經初步調查，警方證實事主於年三十當日，經香港其中一個出入境管制口岸返回內地。
初步睇成件事好懸疑，由於肖建華係活躍嘅金融大戶，喺香港股市都有活動，佢沾手嘅一啲股份，都可能會有壓力。
陸羽仁
金融High Tea 舊文
來源 source: http://hdfin.stheadline.com
