操盤手劄記：
兩會行情短炒時機
■特朗普國會演講，對國防、稅制改革大計依然細節欠奉。 資料圖片
美國總統特朗普首次喺國會演講，對於基建、國防、稅制改革大計依然細節欠奉，邊境稅十劃只得一撇。市場焦點重回美國加息步伐上，利率期貨顯示，3月加息可能急升至80%。港股雖然喺中國2月份製造業
指數（PMI）好過預期下扭轉4連跌，反彈35點，收23776，但已出現多個見頂訊號，後市或會再度調整。
踏入3月，兩會行情啟動，周五政協會議開幕，周日就到人大。今年係「習時代」第五次兩會行情，亦係今屆人大、政協最後一次大會，歷來最後一次都係穩字當頭，冇乜大動作。今年兩會概念股，五大主題可秤先啲，包括供給側改革、混改、一帶一路、環保及房地產。
據國泰君安研究報告統計2000年至2016年嘅兩會行情，喺兩會後10日，A股上升機會係82.35%，會後20日、30日則同為70.59%。不妨趁市況回調入市，吸納A股ETF或中資股，短炒至會後10日左右離場，贏面最大。
兩會概念股中，一帶一路相關股份可睇高一線，皆因今年將有催化劑。5月喺北京舉行嘅一帶一路國際合作高峯論壇，以及9月嘅金磚國家峯會，都會推進一帶一路戰略。一帶一路係中國長期規劃，相關股份短炒長揸都得。相關股份中，遠大中國（2789）係中國幕牆建設龍頭，有份參建北京奧運場館鳥巢和水立方，業務遍及東南亞、中東、歐美和俄羅斯。近兩年受內地房地產不振拖累，部份海外工程又要交學費，業績走樣，股價跌到殘。公司12月底年結，3月公佈業績，佢係滬深兩幢中國最高建築物嘅幕牆承建商，若趕得切入賬有望扭虧為盈。
遠大董事局上月大換血，新行政總裁過往主管歐美業務，另一新執董則主管中東業務，公司似為一帶一路部署。遠大現價0.184元，比每股資產淨值0.512元人民幣（折合0.58港元）低近七成，即三折有售，作為兩會概念股，估值太低殘，除非執笠，否則壞消息已充份反映。
割柑人
本欄逢周四刊出
割柑人
操盤手札記 - 割柑人 舊文
來源 source: http://hk.apple.nextmedia.com
