中環在線：曾豪擲1,500萬落廣告
王維基自嘲儍佬
■王維基噚日出席互聯網經濟峰會分享營商經驗。 朱永倫攝
香港電視（1137）主席王維基（Ricky）一向俾人寸嘴感覺，噚日佢出席互聯網經濟峰會時，竟然失驚無神玩自嘲認衰，一開場已經話自己係嚟分享「失敗經驗」，皆因港視搞緊嘅網購生
意HKTVmall舊年仲蝕緊錢。
唔知邊度嚟嘅勇氣，王維基向現場幾百名嘉賓自白，自爆早年豪擲1,500萬元做港鐵廣告，係個錯誤決定，因為照以前做電訊嘅經驗，掟一、二百萬搵明星拍電視廣告、落報紙全版，第二日就會有好多人湧去舖頭。點知呢條橋放落網購，完全唔work，佢形容自己係個好大喜功嘅「儍佬」。
改搵年輕人揸旗
佢好認真咁話，家陣老闆要做嘅，係搵個信得過嘅年輕人揸旗。所以港視嘅廣告團隊大部份係30歲以下同事，亦投放唔少資源落facebook、Google。佢寄語創業者，要放下過往經驗先至能夠創新。
HKTVmall每日交易額持續增加，盤生意好似開始有起色，不過王維基話：「都係逼出嚟嘅箒，你估我想做e-commerce（電商）㗎，路係人行出嚟嘅。」
講係咁講，佢亦有伺機暗讚自己，話噚日server一度冧咗半個鐘。點解？佢笑笑口話，因為啲單多到接唔曬。華華都希望港視早日賺錢，畀投資者開心嚇喇。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com
