智取大市：揸股王就最簡單
■踏入4月尾，係中央出招打濠賭嘅高危期，持有賭股的話，建議暫時避一避。 資料圖片
周二港股有超過1,200隻股下跌，升股得300隻多啲；噚日亦有逾900隻股下跌。表面上睇係市寬差，但噚日瑞聲（2018）、吉利（175）爆升逾半成，舜宇（2382）升3%，唔少
股份從低位跌幅大為收窄，誇張啲講，跌市感覺只得一日半咁大把，炒風似乎又再起。坦白講今日唔知聽日事，噚日下晝彈唔代表今日上晝唔散，而且第二季出入要步步為營，但絕非全面睇淡，只要係強股，你一沽，佢就彈，chok市就係要你越做越錯。
瑞聲、舜宇向上突破，係真突破定假突破？不如唔好估咁短，之前本欄多番強調，以舜宇MACD走勢睇，擺明呢隻股係股王級，股價隨MACD一齊見頂，簡而言之，股價頗大機會繼續破頂，只睇呢個牌面都值得Hold落去。點解小弟之前強調要低吸，因為港股市場上太多假突破，4月淡季高追股份容易左一巴、右一巴，追貨心理壓力比撈貨仲大，未有貨可考慮分注買嚟減低風險。
濠賭股偏弱，銀娛（027）股價尾市未能跌幅收窄，走勢麻麻。踏入4月尾，係中央出招打濠賭嘅高危期，可能係春江鴨嘅關係，賭股過往會喺中央出招前先行轉弱，然後出消息再裂口下跌，所以今次要小心市場傳出防走資招數震散股價，有貨的話，暫時建議避一避。
晉佳
http://fb.com/advanceguy1
晉佳
智取大市 - 晉佳 舊文
來源 source: http://hk.apple.nextmedia.com
