笑到最後：
天價公屋陸續有來
■公屋富戶政策收緊，購買力強的公屋富戶，為了不被趕走只好投入市場。 資料圖片
舊年11月初，本欄寫「辣招令樓價再升一成」，以中原城市指數計，目標升至158點。當時指數為143.49，加辣近半年樓市幾乎有升冇跌，最新公佈點數為152.77，升幅達6.47%
。當然，如果計埋指數以外嘅新盤同公屋成交，樓市一早升超過一成，但本欄冇打算搬龍門。
可以肯定，只要冇宏觀大事發生，例如美韓核戰、聯儲局宣佈一次過加息一厘，本欄預言到價係遲早嘅事。點解咁肯定？因為中資已經落疊天價投地，香港政府絕對唔會推冧樓市，反而會配合：連番加辣削減二手供應，挾高樓價；即將進行申報嘅踢走公屋富戶政策，將會為樓市帶來新一輪購買力，確保他日中資落成賣樓時，樓價仍高企。
最近兩個公屋王已經係先兆。沙田公屋顯徑邨賣500萬元；黃大仙竹園北邨綠表以306萬元成交。非公屋用戶一般甚少會買返公屋，因為住宅地址本身有身份象徵。公屋雖然係特權，係人都想有間公屋，但始終住公屋代表基層，冇人會問你嗰間係咪天價公屋，只會客觀知你係住屋邨，唔係住開好難跨出一步去用天價買。
公屋本身嘅好處係實用，唔會有私樓嗰啲窗台或發水面積，而且舊屋邨發展成熟。非物質嘅優勢，則係本身有親人住喺同一屋邨，方便湊細路。但最大誘因應該係公屋富戶政策收緊，今年10月開始申報，唔合格要踢走，逼最後仍然保存購買力嘅人，即係公屋富戶投入市場。
公屋住戶個個月贏在起跑線，原本唔富，住落幾年都變富戶，遲早都會超標，床下底儲埋一大嚿錢，一係自己買，一係幫下一代畀首期，以免第時被趕走。大家可能會問：炒到公屋咪好似股市炒到三四線股，樓市仲唔爆煲？公屋富戶隱藏大量財富，將會因政策而釋放，幾單天價公屋成交令沉睡嘅富戶資金蘇醒，越近申報期越多癲價公屋成交，令樓市繼續「市底強、市面都強」。同一番話等市面轉弱先再講啦。
高明
http://www.fb.com/bigricetea
本欄逢周一刊出
高明
笑到最後 - 高明 舊文
來源 source: http://hk.apple.nextmedia.com
