笑到最後：
樓市再加辣屬靠害
■荃灣區有新盤一房單位開價過千萬元。 資料圖片
中原城市領先指數連升8周最新報150.89點，實際樓市可能比指數升得更多，因為今次樓市上升源頭嚟自新盤，全部都冇計入指數度，個別荃灣盤一房單位嘜價至過千萬，指數根本反映唔到樓市嘅瘋狂。
樓價連升8周，引嚟政府
再加辣嘅預期，因為上一次2012年9月至11月樓市亦出現8連升及創新高，隨後政府推出3D三辣招。可惜嘅係，好多未上車市民一廂情願以為辣招「幫佢」，客觀效果有辣招樓市再挾升，只係靠害。本來香港樓市係大藍籌，成交多、球場大，辣招令樓市貨源歸邊，成交有如細價股般疏落，有貨嘅小業主見稅貴一動不如一靜，造就有新盤大貨嘅發展商變成莊家。
好多時炒細價股，買賣兩邊互等，希望對方可以就低一格去成交，形成僵持局面，只要有一個唔怕死嘅勇士掃兩版，原先等嘅人覺得等唔到，就會改為直攞，人踩人搶貨造就升幅。但細價股同樓市唔同嘅地方係，好多細價股一見有買盤，就會瘋狂「B貨」直沽出街令升勢打回原形，甚至倒跌；相反，發展商賣樓機制比較成熟，有秩序散貨，唔會一棍打死，再加上政府連年加辣，二手貨源更乾，無競爭下更好挾。
倘若政府再加辣，估計都係加稅率、加辣招年期等等，除非現政府推出「真辣招」，持有自住以外物業刑事化，變相否定私有產權制度，否則對現有格局分別不大，更甚係一加辣就有人衝入場，因為以前香港人未了解辣招用途，出政策後都仲會觀望。今時今日大家都知辣招係為咗令樓市挾升，再出辣招恐怕會當壞消息出盡，一加辣又再一窩蜂搶新盤。好多人期望香港出現樓災，期望咗好多年，以現水平計，即使樓價跌一半，都仲有好多人買唔起樓。現屆政府餘下任期加辣嘅唯一好處，就係再挾高樓價，令下屆政府喺更高樓價基數上台，5年任期內，一旦樓價平穩甚至回落，到時就可以聲稱比上一任能幹。
高明
http://www.fb.com/bigricetea
本欄逢周一刊出
高明
笑到最後 - 高明 舊文
來源 source: http://hk.apple.nextmedia.com
