Money Walker：樓價與物價失衡怪現象
■特朗普嘅刺激經濟能力較預期遜色，通脹預期大為冷卻。 資料圖片
去年底曾經升溫嘅通脹預期經已大為冷卻，事關侵侵刺激經濟能力較預期遜色，而且油價近月欠缺起色，不過通脹谷極唔起其實受多項因素影響，互聯網就被指係極大元兇。
所謂「Internet Deflation」（互聯網通縮），係指互聯網興起加上網購盛行，令消費者格價日趨方便，比較不同酒店房價嘅旅遊格價網站出現，就係例子。雖然消費者能夠從中受惠，但商家定價能力卻因此遭到削弱，最終導致大環境嘅整體物價升幅都受到限制。
著名投資者麥樸思（Mark Mobius）曾指互聯網令物價下跌，導致央行難以搵到原因去加息。由於經濟好壞對通脹嘅影響已大不如前，有分析話環球央行以刺激通脹為目標嘅貨幣政策已不合時宜，因物價長期低企，即使環球經濟危機遠去多時，加息大時代亦遲遲未至，扭曲資產市場。
環球資產價格水漲船高，尤以物業最為嚴重。最諷刺係各國計算通脹時，普遍唔會計入樓價，所以樓價持續癲升，但通脹依然冇乜影。反過來睇，各國央行於加息方面一拖再拖，低息下資金冇出路湧入樓市，連同供樓利息成本低企，衍生環球多國樓價高居不下困局，更造成通脹越低樓價反而越高嘅怪現象。當通脹僅可透過樓價呈現，樓價與其他物價未來有機會進一步分化，央行能否利用更創新貨幣工具解決此失衡局面，平衡高樓價與低物價，值得留意。
El.
http://fb.com/moneywalkerhk
本欄逢周三刊出
El.
Money Walker - El. 舊文
來源 source: http://hk.apple.nextmedia.com
