智取大市 - 晉佳 2017年7月12日
智取大市：長線投資講心態
■炒股票長揸定短，應該取決於自己嘅個性。 資料圖片
如果話長揸定短炒股票，係一種個人策略嘅選擇，就似乎講得太過簡單。一個人如何決定自己點投資，亦要取決於自己嘅個性，假如閣下性格較為悲觀、又或者鍾意「居安思危」，時刻要為危機、爆煲做準備，你如何能夠買股票然後合埋眼長揸？
能夠如曾淵滄教授咁樣，唔理短期股價上落，首先要成為樂觀主義者，經常覺得世界只會一日比一日好，信念唔會因為任何嘢而改變，睇起上嚟好似好容易，但其實好困難，莫講話唔肯定三年之內有冇危機，就話一年內有冇股災，都話唔埋。與此同時，經年長揸股票獲利嘅超長線投資者，仲要有對自己選股有非常強大信心，因為長揸股票要經歷股災，高位輸掉五六成資金，可以喺下一次牛市回報十倍奉還。話曬每次股災都有其獨特之處，點知下一次會唔會宇宙大爆炸？齊齊輸身家？至於超長線持有股票呢回事，小弟坦白講冇本事做得到。
回帶2008年金融海嘯低位當日，係小弟遇過最大鑊嘅跌市，當日大家唔止覺得銀行會執笠，連歐洲多國政府都要爆煲，世界末日之際，要買股票嘅唯一理由，就係「人類係解決問題嘅動物」。
晉佳
http://www.fb.com/advanceguy1
本欄逢周一、三、五刊出
晉佳
智取大市 - 晉佳 舊文
來源 source: http://hk.apple.nextmedia.com
