Money Walker：美債息2.6厘係銀行股關鍵
■留意當十年期美債息逼近2.62厘，就差不多係時候從國際銀行股撤退。 資料圖片
話說美國加息講到冇嘢好講下，人人轉而聚焦歐、英、加央行幾時退市或加息，「環球收緊幣策」成為第三季投資主題，造就國際銀行股成為第三季熱
炒板塊，顛覆咗多年來科技股為王嘅根深柢固思維。
筆者認為炒央行加息呢個宏觀主題未算實在，憧憬歐央行退市尚算合理，畢竟佢係主要央行中寬鬆程度數一數二高，但油價疲弱格局未改下，加拿大就算加到一次息，都要有排先第二次，而英國脫歐後續問題難測下，該國加息前景亦未敢樂觀。
其實呢輪環球收緊幣策嘅炒作，不過係舊酒新瓶，市場由去年底已開始講「通脹再現」（reflation），但特朗普無力為環球帶來通脹，加上油價持續反彈乏力，導致環球齊齊加息嘅預期於第二季起沉寂。隨住美債同科技股越炒越貴，連同歐央行總裁德拉吉有意讓幣策回歸中性，「收緊幣策」憧憬再度乘勢而起，國際銀行股自然落鑊。
講返呢期氣勢如虹嘅國際銀行股，造好最大原因係加息預期升溫推動債息走高，以及美國監管放鬆，問題係呢兩項正面因素唔係建基於憧憬就係一次性因素，而最關鍵嘅環球經濟復蘇力度則未見好轉。所以講到基本因素，美國大型科技股似乎較大型銀行股來得實在，最少科技行業本身真係有增長。事實上，唔少大行對科技股睇法亦不約而同短線淡但長線仍好，純粹擔心估值太貴下短期有調整。
筆者相信，市場對環球央行加息嘅憧憬，會逐漸降溫為預期環球央行回歸中性幣策（除美國繼續加息外），故銀行股難以長期當炒，只會隨加息憧憬變來變去而久不久受捧。不過短線而言，至少喺美國大銀行月底放榜前後，環球銀行股呢轉升浪仍可跟炒，留意當十年期美債息逼近2.62厘，就差不多係時候從國際銀行股撤退。
El.
http://fb.com/moneywalkerhk
本欄逢周三刊出
El.
Money Walker - El. 舊文
來源 source: http://hk.apple.nextmedia.com
