收市閒情：股票傳心師分三類
■同動物傳心聽得多，股票傳心師你又見識過未？ 有線電視截圖
世界之大，無奇不有，你都唔識動物傳心，你又點知冇動物傳心師先？正如，世界上，一直都有「股票傳心師」。「股票傳心師」一般分為三級，當然，層次上係有分別。
第一級傳心師：
「我沽咗平保（2318）。
」同事行過嚟，喺言語同眼神之間，我見到一樣嘢，係自信，「嚇！點解呀？你幾錢買？幾錢沽」「噚日$54.5買，啱啱$54.7沽。」「做咩賺2毫就走？」「冇呀，我覺得佢個勢唔得！」冇錯，就係「覺得」呢兩粒字，「覺得」講嘅係感應，係Feel，冇理論基礎，你能夠感應一隻股，仲唔係傳心師？！
第二級傳心師：
「唉，我隻平保呀。」「做咩呀，你唔係沽咗咩？」「係呀，咪就係我沽完佢就升。」如事者，呢類對話每日無限輪迥，久而久之，你發現，佢沽親咩，或買親咩，只要你反向操作，都係唔啱唔早剛剛好，跟佢就會發達了。呢一類傳心師，唔止能夠感應，仲可以影響一隻股嘅走勢，能力方面又昇華多一重。
第三級傳心師：
就好似動物傳心師咁，當一個人能夠用一堆似是而非嘅理論，去解釋一啲常人唔能夠解釋嘅事，仲要有Fans，呢類傳心師屬頂級一類。「點解隻股跌？」「因為50天線跌穿100天線然後莊家平倉加上量子力學上影響粒子結構，所以佢原本是升，最後跌……」呢類傳心師，唔單止睇穿股價嘅粒子理論，更可以有一大堆追隨者，呢類傳心師，絕對係搵到食嘅傳心師。
世界有冇人識動物傳心，冇人講得埋，但反正，正如股票Number降一樣，一個Number，講一次，冇人信，講十次，就變成是真理了。
千頌C
http://www.fb.com/winbigwok
本欄逢周三刊出
千頌C
收市閒情 - 千頌C 舊文
來源 source: http://hk.apple.nextmedia.com
