【實力取勝】窩輪實戰操作（陳承龍）（第133期）
2017-7-13 18:30:13
話咁快又一個禮拜，又係嗰句，要講嘅，喺節目度講曬，所以寫呢篇嘅時候都幾頭痛。不過，話冇嘢寫啫，點都有啲嘢落鑊嘅。就近期而言，小弟都算幾好彩，中到幾隻大嘢，當中梗少不了我嘅重中之重滙控（00005
.HK），一來保得住條J，二來又贏到錢。講真，滙控是小弟近年睇得最好嘅藍籌，由舊年6月吹到依家，即大概由50元水平叫買，一年時間贏佢廿幾蚊，算係咁，如果期間捉到佢啲貼價輪，係咁換，其實都有唔錯回報，事實上，小弟一直係咁樣做，所以過去一年，我個投資組合可謂靠滙豐一股救全家。
講真，由年初至今，雖然恒指由21000點挾到上嚟26000點，但呢5000點一啲都唔易賺，因為中間都磨得你好緊要，除非你買中700、175、3333呢啲勁嘢，否則，你未必贏到大錢。之不過，如果你有揸隻滙豐，其實都唔差，雖然正股回報唔係話好勁，但如果你揸中啲夠爆發力嘅輪，都咪話唔禾味。事實上，如果6月份，大家有跟我買隻14312呢條滙豐輪嘅話，就明白有幾勁。呢條14312嘅行使價大概係68.9元，而呢條輪當時只有約1%溢價，但有超過10倍槓桿，我諗大家仲記得，呢條輪當時仲係喺價外，所以都有好大風險，隨時變廢紙。當時大家最貴應該係兩毫子，正常普遍係毫半子，不過，之後正股硬係唔肯上，仲要打返落去67元水平，搞到條14312打到9仙，大家都心灰意冷，點知一個屈尾十，6月尾二一個交易日，正股突破70元大關，而且越升越有，就係嗰幾蚊升，條輪單日就升近300%，大家當堂乜仇都報曬，如果依家仲揸住嘅話，用最貴兩毫子買入價計，都仲升過兩倍，係咪好正呢？講真，我唔係想導大家沉迷賭輪，但如果捉到一個大單邊升浪嘅話，呢啲衍生工具其實都唔錯。
由於大家炒輪炒上癮，所以依家策略王有時都變身成為輪證策略王，有時反應太好，有啲輪真係畀大家買爆咗，搞到100%街貨，最新近兩個例子，就係28337同28984，100%街貨係會爭啲，尤其係價外，或剛剛價內，因個輪價可能被市場自己炒貴咗，不過都唔使驚，最緊要正股繼續升就ok，好似28984，佢呢排一度炒價內，但好多朋友即問點解唔跟正股行，仲問責個發行商，但再細心啲睇返，條輪本身冇問題，事關佢到價內之前，已預先爆升咗一段，呢條輪我在正股未到72元介紹，而28984當時市價約0.16元，隨後正股爆上75元，條輪已累升了一倍，已爆了一段勁嘅，由於條輪已升過咗龍，所以到佢價內嘅時候，條輪價嘅已越超咗佢嘅合理值。不過，都係嗰句，只要正股繼續升，條輪嗰溢價回落，佢個價就會自然回復合理價值，所以完全不要擔心。當然，如果覺得唔舒服嘅話，咪換過條再低啲溢價嘅輪囉。其實，我有陣時都幾倒啲輪商米㗎，因為佢哋好少介紹啲低溢價高槓桿嘅輪，因為呢啲輪通常最好爆，14312就係最好例子。講到尾，輪證本身唔係話真係咁易炒，之但係揀啱時機，揀中條款嘅輪，有時都唔錯，只要你預咗有會輸呢個心態先，因為可以全部輸曬，但贏可以好多倍，自己衡量有冇能力先好玩，唔好見我贏推滙豐輪又想跟衝，我都交過好多學費㗎。
最後，我又想講嚇澳門股，之前我話沽曬啲賭股，話轉轉哋弱勢，不過諗真啲，又唔使驚，因為中國人品性難改，所以應回吐幾天後應該又會向上。睇返數據，今個月首9日賭收68億，每日平均7.5億，滙豐證券說7月可能增長27%。繼續向好。學校放暑假會有多些香港和內地一家人去澳門玩，應該會令賭收增加。銀河（00027.HK）的銀河渡假村和新濠（00200.HK）旗下的新濠影滙，新濠天地會受歡迎，因為它們的設施如泳池等適合全家人。
我朋友一家今個星期六想去澳門玩一天。永利冇房，新濠天地一間要3911元一晚，仲貴過香港四季酒店，即係所餘房間不多。即是說下今個星期賭收會繼續好。其實就咁簡單，自己上網望嚇先，如果係嘅話，賭股又要買過。新濠是首選，因為它中埸和VIP都做到。
實力取勝 - 陳承龍 舊文
來源 source: http://www.winmoney.hk
