操盤手劄記：中聯重科走勢強
■內地上半年基建工程穩步增加，中聯重科業績可望持續改善。 資料圖片
中美全面經濟對話喺華盛頓召開，官員開會前夕，先行埋枱食飯。席間，中國副總理汪洋放聲氣，叫美方放寬高科技產品出口；美國財長姆欽亦回敬，叫中方開放信息及通信技術產業。受消息刺激，納指、恒指
孖住上，齊齊八連升。港股今輪破頂升市逼使持倉比重較低嘅基金追入，呢啲挾weighting嘅買盤，成為大市短期動力。
喺時代巨輪下，無論國家、企業，以至個人，都要求變。以企業為例，作為管理層，要有vision之餘，亦要有帶領企業轉變、幫助同事轉變嘅能力。近日傳媒業最O嘴事件，莫過於肥佬黎賣壹仔畀黃浩，在商言商，無可厚非，但員工好㷫，形容單刁係「賣員工落妓寨」。壹傳媒（282）轉型數碼化，轉型唔係好難，點幫同事過渡先係最難。
講到轉型，諗起一隻機械設備股──中聯重科（1157），該公司係中國最大工程機械商之一，喺行內最早轉型。舊年公司進行供給側改革，將低效率項目斬纜，又進行營銷改革，優化人手，喺轉型陣痛中，勁蝕9.3億元人民幣；不過，今年首季已扭虧為盈，賺近8,500萬元人民幣；上周五更發盈喜，預告上半年賺11億至13億元人民幣。
內地上半年基建工程穩步增加，帶動換機潮；加上中央喺十三五期間力谷城鎮化，中聯重科業績可望持續改善。該公司早前以116億元人民幣出售環保項目，預計帶來91.3億元人民幣利潤，手頭現金將大增至200億元人民幣以上。不過，睇份盈喜通告，單刁應未完全入賬。
A股入摩，涉及222隻大盤A股，包括中聯重科A股（深：000157）。中聯重科近日價量齊升，走勢轉強，H股現價4.14元，相對A股有26%折讓，相對每股資產淨值亦有27%折讓，仲未計出售環保項目收益。該股一向願意派息，舊年蝕本都派15分人民幣（17.16港仙），今年有望增加。機械設備股低潮已過，今年回暖，不妨見「機」行事，候回至4元樓下吸納。
割柑人
本欄逢周四刊出
割柑人
操盤手札記 - 割柑人 舊文
來源 source: http://hk.apple.nextmedia.com
