有位泊車難 貴刁唔易炒
2017年07月20日
港股呢排變左慢牛，日日升啲，雖然美股高位有阻力，但昨日輪到科網股爆上，推到指數再創兩年新高。
大市輪流炒吓，中環茶友執錢之餘，最有興趣係講吓壹傳媒(282) 宣佈以3.2億出售《壹週刊》呢單嘢。中環茶友個個挑通眼眉，唔會淨係想當然
，佢地自己睇完通告同年報，就有自己睇法，呢啲財經觀點，同口水佬斷估又唔同。
壹傳媒股價近打回原形
有個中環茶友2012年炒過佢賣台灣報紙賺過錢，壹傳媒而家股價接近歷史低位，絕大部份小股東之前買左壹傳媒無放，到而家都係輸家，茶友在呢隻股身上賺過錢，特別覺得自豪。當年佢識得係1.7元沽貨，皆因佢計過就算賣盤成功都係值多幾毫子，所以一見佢回頭就跳車。後來壹傳媒賣台灣報紙單嘢散左，股價大插。呢次壹傳媒又有賣產消息，佢又去睇吓通告，再睇埋呢兩日股價，結果認為呢單消息炒作味好濃，皆因醒目資金似乎對交易係咪可以落實好有保留喎。
茶友拆局，佢話係交易公佈前，壹傳媒成交好少，股價過去一年最低去過0.3元，比較多時間係0.33至0.37元間徘徊。消息公佈前在上周五曾經炒高小小，本周一公佈當日最高炒左上0.59元，但消息見光死，股價當日下午一開已是最高位，跟住就跌番，昨日收市報0.375元，再跌9.6%，跌得兩跌，幾乎打回原形。初步睇可能有人收到小小消息走去入貨，但睇完交易條款，醒目資金都拒絕入場。
壹傳媒有24億發行股數，若然賣產收番3.2億，理論上等如一股收番0.13元。由於《壹週刊》等相關雜誌業務去年虧蝕1.6億，若然係賣得成功，壹傳媒斬斷窮根之餘，仲有每股0.13元落袋，所以股價應該可以升0.2元，而家股價升得幾仙，接近打回原形，咁市場點睇呢單交易都可以估到啦。
咁點解市場會咁快對交易有懷疑呢？相信同佢聲明公佈雙方初步協議條款有關，買家黃浩只係畀左1000萬元誠意金，可以在年底前「獨家」斟盤，若然最後買唔成就輸左呢筆訂金。
不過，呢個所謂「獨家」原來係壹傳媒如果同人再斟，最後唔賣俾佢，咁就賠多1000萬元。雙方都無乜約束性。
茶友話，如果黃浩有足夠資金又真係想買的話，點解只係畀成個交易2%錢，而唔係落重訂防止賣家撻訂呢？簽臨約買樓都放5%訂金啦，茶友話自己過去畀過10%簽臨約防止賣家撻訂，2%訂金太濕碎啦。
掉過頭嚟講，若然壹傳媒有好多買家，做乜又要接受個低訂金的條件，俾人攞個盤去搞呢？茶友笑言，商界有好多泊車仔搵食，不過要搵個靚位去泊車唔係咁易，若然畀小小錢可以霸靚車位，再睇睇有無闊佬想泊車，呢條都係絕世好橋。不過，如果個車位好多人想泊，個業主又係咪咁隨便由你放低20皮就可以霸位呢？所以由霸位到食胡，仲有好長條路要走喎。
市好莫玩高難度嘢
有人話，做傳媒大亨好過癮喎，又或者阿爺想畀錢買起唔啱嘴形的媒體呢？呢個茶友都有啲北京線，話做得闊佬，唔使出錢就話威吓水啫，要出錢都會計數啦。至於話阿爺要買起唔啱嘴形媒體，如果本雜誌本身已經蝕錢，點解唔等佢自然死亡，仲要叫人花錢去買起佢？更大問題係咁樣畀錢買起佢，變左幫人斬斷窮根兼送銀彈佢使，計落好似唔多啱數喎。
茶友話自己唔關心政治，只關心炒股，3億2賣走蝕本雜誌是「貴刁」，佢想睇吓有無得「炒貴刁」，但睇左兩日發覺牌路唔對，茶友都決定唔落場，做吓花生友算數嘞。
聽完茶友一輪嘴分析，大家都話而家市況，要搵錢唔使搞啲咁高難度嘅嘢，好似呢排個市輪流炒，恒指昨日又升147點，收報26664，國企指數收報10860，漲105點，成交909億元。
有膽高追炒科網股，買騰訊(700) 佢創新高高見298.8元，收市升幅收窄，仍漲3.91%，收報298元；其他舜宇光學(2382) 再急升7%，收報99元，就算穩穩陣陣買盈富基金(2800) ，都升0.6%，收報27.3元。
陸羽仁
金融High Tea 舊文
來源 source: http://hdfin.stheadline.com
