大棋局：誰要買瑞士央行
■瑞士央行股價於去年7月至10月間，短短3個月爆升近一倍。 資料圖片
全世界最穩陣嘅銀行股，應該係央行股票。股價當然都有上落，但執笠機會極低。全球四大上市央行：瑞士央行、日本央行、比利時央行、希臘央行（南非央行股票只有場外交易），瑞士央行股價
一枝獨秀。去年7月時，該行股價仍然係1,100蚊左右（瑞士法郎，下同）。其後突然爆升，至去年10月，股價升至2,120蚊高位，幾乎3個月升一個開。截至上星期五，股價仍徘徊1,900蚊上下。
先睇瑞士央行股票持有情況，該行45%股份由瑞士各州持有，15%由各州銀行持有，餘下的40%喺瑞士證交所上市交易。呢40%喺交易所買賣嘅股票，基本上由公司或私人持有，瑞士聯邦政府冇持有任何股份。其中持股最高的私人股東，係德國商界領袖Theo Siegert，揸住7%。若佢持股超過10%需要披露，故神秘買家應該唔係佢。
再睇瑞士央行揸貨情況，該行截至2016年末持有嘅資產規模達7,470億，而瑞士2016年GDP估計為6,400億。從表面價值來看，擁有瑞士央行，抵得上擁有瑞士一國。所以在超級大戶眼中，瑞士央行唔止係最穩陣嘅銀行股，更似一個資產管理機構。加上瑞士銀行業向來就以獨立、保密見稱，據《瑞士聯邦央行法》第6條，瑞士聯邦委員會、瑞士聯邦議會都唔可以幹涉其貨幣政策。
瑞士央行股價大升，買貨買得咁急咁狼，甚似近年中國只要貨、不問價嘅走資手影。中國走資趨勢主動、被動並存，除咗富豪一面叫人嗱嗱聲愛國自己卻雞咁腳走之外，人民幣發展至今亦要轉型，逐漸降低外滙作為貨幣發行基礎的比例。這是中國的大兼併時代，不止對外，國內大企業亦處於伺機互相吞噬嘅情況。在此情勢下香港當然不能幸免，香港將來之其一價值，就係仿傚瑞士央行作為資產管理角色。想靠擦鞋自保，也許太天真一點。
Mr. Tregunter
本欄逢周二刊出
Mr. Tregunter
大棋局 - Mr. Tregunter 舊文
來源 source: http://hk.apple.nextmedia.com
