笑到最後：今浪無「少年股神」
■指數升破27000，但呢個大牛市，應該唔會出現少年股神。 資料圖片
大牛市，特別係牛三，往往輸錢嘅人多過贏錢嘅人，當然，平日股市都係少數人贏大部份人嘅錢，只係牛三來得快，跌得仲快，反應慢嘅投資者喺最後階段先入場，冇享受過升幅，但成個跌浪就食盡。
為咗避免
同樣嘅事再發生，好多人，包括高明，都想搵一啲今次牛市見頂先兆，等大家升到盡前大概有個位走貨，贏住走好過一手都係貨渡過熊市。對於離場先兆係乜，上星期高明已經講過，唔重覆。
坊間有一個量度指標，就係今次未見少年股神，所以肯定未見頂。以今次升浪嘅特質嚟計，就算個市炒到上5萬點，都唔會出現少年股神。因為今次大牛市，係屬於有資本嘅老人家。今次炒風集中騰訊（700）、平保（2318）、匯控（005）、友邦（1299）呢啲大藍籌，呢類股份每手計上萬蚊，一個少年除非有富爸爸，否則可以買幾多球？
少年股神係要型，炒不知名細價股贏大鑊，佢可以吹到中南海有條針；但話買騰訊、匯控贏大鑊，一來唔夠型，二來知你「少年」資本有限，贏唔到幾多。當然世上有衍生工具，炒窩輪贏大錢，都算幾型。
不過問題係，窩輪賺大錢只可以係未升嘅情況下買入，當目前大部份股票升幅都揚曬，買窩輪只係有槓桿嘅順風車，唔係暴利。只要正股橫行一個禮拜，窩輪或期權蝕時間值都元氣大傷，好難講大賺。至於牛熊證，個股槓桿一般最多只得十幾廿倍，計番倍數都係有限。就算係衍生工具，目前係以大博大，同以前少年股神以小博大玩法唔同。
歸根咎底今次升浪只集中幾隻大藍籌，搞一大輪，只要資本夠多、肯坐，已經贏得多過大部份高手。
所以結論係：一、今浪唔好當「少年股神」係指標，幫唔到你睇見頂訊號；二、今次又係世代之爭，後生肯定冇份贏大鑊，只可坐順風車；三、如果有人自稱少年股神，哈哈哈，佢應該好等錢使。
高明
http://www.fb.com/bigricetea
本欄逢周一刊出
高明
笑到最後 - 高明 舊文
來源 source: http://hk.apple.nextmedia.com
