投資者言
2017年09月18日
港股上周基本上係浮浮沉沉打底，最後一個交易日傳來北韓射導彈，港股即時跌一跌，但臨到四點鐘忽然有力量將指數推番上去高收40點。恒指收報27807，國企指數收報11067，成交金額1172億元。以全周計，恒指累積上升139點；國指累積下滑82點。美股收
市就造好，杜指周五收市報22268點，升64點，納斯達克指數收報6448點，升19點，標普500指數收市報2500點，升4點。
指數冇乜大突破，大市炒個別。上星期金融股表現平平，但有隻冷門股國浩(053) 就衝關而上，成為紅底股。國浩曾經係道亨銀行嘅大股東，後來以高價出售咗俾星展銀行，手頭有大筆資金用嚟做金融投資，包括持有13.75％東亞銀行(023) 嘅股權，市場經常猜測，佢會挑戰李家係該行嘅管理地位。
國浩押注中日股賺到笑
國浩集團成為紅底股咁叻，皆因業績靚仔，佢係上個月尾公佈截至6月底止全年業績，盈利61.24億元，按年大幅增長咗98%；每股盈利18.84元；派末期息3元。佢嘅主要業務包括自營投資、物業發展及投資、酒店及休閒業務、證券及期貨商品經紀業務及投資顧問、銀行及融資、保險、基金管理、股票經紀以及商人銀行。
國浩去年業績咁好，主要係自營投資，即係自己買嘢炒表現出色，所以陸羽仁都留意吓佢點分析全球嘅投資環境。根據管理層講法，佢哋嘅投資策略一向為發掘隱藏寶石嘅價值股，或把握將臨扭轉之行業或周期。過去一年佢哋覺得美股市值過高，將不會再提供領先利潤，所以早已撤離。反之，佢哋把相當數量的資產投資於表現較為遜色的日本及中國股市，認為估值較具吸引力。美國大選後帶動日本成為表現最佳之主要股票市場，中國股市於下半年亦快速趕上，兩個亞洲股市在去年為集團帶來大部份收益。
對於未來市況，管理層意見係歷史告訴大家，連續九年的經濟增長較可能使全球經濟走向擴展期之結束，因此集團將保持審慎，專注於價值投資及「降級天使」投資。簡單咁理解，即係好似陸羽仁成日講嘅，貴嘢唔買。
美股呢排挑戰新高，但市場情緒仲係有啲審慎，主要係美國今個月就會縮表，個市升得愈高，借消息回調機會愈大，市場對消息都會變得敏感。上星期，美國8月消費物價指數(CPI)錄得七個月以來最大升幅，按月升0.4%，按年升1.9%，兩者都高於市場預期，進一步貼近聯儲局設定的2%目標。數據公佈後，市場對聯儲局12月加息的預期再升溫。高盛就發表報告，話美國通脹已明顯企穩，令聯儲局年內第三度加息的機會增加，將年內再加息機會率由55%上調至60%。
怡東傳收靚標推高地產股
美國縮表前夕，得意嘅係內房同本地地產股都炒上。本地地產股利好消息之一，在新加坡上市的文華東方國際放售的銅鑼灣怡東酒店截標反應唔錯。市場消息指出，文華接獲多個財團入標競投怡東，標價均超過三百億港元，財團包括新鴻基地產(0l6)，希慎興業(014) 。文華東方上周在新加坡交易所最多曾升百分之二十三，高見二點六一美元；收市報二點五六美元，即二十港元，升幅達到百分之二十點七。成交股數高達六百一十七萬股，較過往平均高約六倍。可能受呢個消息刺激，早前勇奪中環美利道地王嘅恒基地產(012) 都高收54.15元，創咗收市高位。
至於內房股同樣強勢，多隻股份破頂。萬科(2202) 周五曾漲逾6%，高見29.35元，收升2.9%報28.4元，是表現最好國指成份股；融創中國股價破頂大升，收報33.5元；計劃分拆物業管理業務上市的碧桂園(2007) 則漲6%，報收13.56元。由於佢哋升得咁開心，好易令人唔捨得離場。內房大股市佔率高，有條件揸吓條數谷大盈利，配合股價炒上。要記住嘅係，中港地產股對利息同資金供應始終係敏感啲，估值愈高，壓力愈大，短期可以訂好止蝕跟炒，但做牌唔食胡，始終無真銀落袋，炒到咁上下就要考慮睇位食啲胡。
栢能跌得甘過比特幣
最後，講兩句比特幣概念股柏能(1263) 。佢由於有生產用嚟開礦採比特布嘅顯示卡，股價月初爆上，不過，隨著內地大力收緊比特幣交易，令到比特幣嘅市價急跌，佢都跟住腳軟，由高位4.6元跌咗落3.01元，跌幅仲勁過比特幣。早排比特幣急升，中美皆有重量級人馬隨之出嚟狂轟，美國摩根大通老總戴蒙話佢係騙局。內地專家講得仲激，國家金融與發展實驗室理事長李揚在金融街論壇直指，有些金融創新並沒有服務於實體經濟，而比特幣就是一例。李楊質疑比特幣打着高新科技的旗號，覺得可以擺脫人行，擺脫黃金，可以給社會一個新的定價標準，但事實上產生的並非上述效果。按佢嘅講法，比特幣不是貨幣，貨幣所需要的幾個條件比特幣並不具備，比如說必須幣值穩定，又話貨幣的供應能夠隨著經濟增長而穩定地增長，但比特幣並不具備這些特點，所以呢啲虛擬貨幣只會危及金融穩定。由內地專家嘅態度，睇到中央短期對比特幣打壓都唔會放鬆。其實，凡舉呢啲民間有投機活動，從來只宜燒冷灶，因為一熱阿爺就出手，到時邊個走得摩，邊個就蝕底。
電競潮熱 英皇快手插旗
科網被視為新金礦，大家爭住去掘。睇準電競會成為亞運項目，一班富豪最近紛紛擲銀大搞，好似新世界鄭志剛，仲有英皇老闆楊受成。
英皇上個星期六就喺觀塘商場同電競總會簽署合作儀式，實行大搞，活動請咗商務及經濟局局長陳百里做主禮喜賓，簽署合作儀式，楊老闆同佢公子都有現身，仲有英皇旗下一姐容祖兒撐場，可見重視。
做生意執輸行頭慘過敗家，做得城市富豪反應就要快。呢排個個都話做電競，做開娛樂事業嘅英皇就唔蝕底，搵咗旗下藝人洪卓立幫手做電競隊嘅生招牌，有份去捧場嘅中環茶友，話英皇班星照住，活動氣氛都好熱鬧。英皇一向做開娛樂，而家搞多一瓣，投資有限，淨係要嚟省招牌都抵。
搞電競同炒股一樣
富豪個個都插隻手埋去搞電競，至於做法就各師各法。英皇同電競總會合作，新世界鄭公子就與內地第二大移動電競產品研發商英雄互娛，簽署10年合作計劃，雙方計劃在包括香港、上海、北京等全國最少9個城市的K11項目，建立VR體驗館及電子競技主題的酒吧餐飲娛樂互動區。
電競活動被視為新產業，好多富豪第二代都好有興趣玩番份。有做開創科投資嘅猛人講起做電競投資，就笑笑口話電競係產業，但要留意係對搞手嚟講喎，言下之意，即係話搞電競就有得搵銀，如果瞓身打機玩電競搵到大錢，咁就真係十萬中無一，即係好似炒股票，最易發達梗係印股票嘅上市公司老闆，而唔係場邊啄啄吓嘅散戶啦。
陸羽仁
陸羽仁周記 - 陸羽仁 舊文
來源 source: http://hdfin.stheadline.com
