金手指：混改下必追摩比
■摩比喺6月尾中移動最新一輪投標，成接收器最大供應商，地位躍變龍頭。 互聯網圖片
早排，聯通（762）混改方案出台，令孫柏文諗咗好耐究竟贏家是誰？純睇股價，入股或被入股嘅，全部冇料到。點解？混改其實似當年向中石油（857）抽暴利稅咁。今次只係向啲互聯網公司，例如
騰訊（700）開刀。「國退民進」？哈。
咁搞乜？上周睇《有線》，內地啲廢青只係想搵夠後就上網打機，返一日打三日。即上網已成政權維穩極重要工具。亦即中移動（941）、聯通冇得加價cap水，不過就要投資為網提速，因lag機是會暴動的。
仲有，中移動已富可敵國，有潛質成為挑戰中央嘅機構，所以一定要制衡。聯通今次揼心口籌750億人仔，加埋手上現金，都只係千多億，即中移動嘅四分一，所以政府點都要死啲錢畀聯通投資，最好5G市場一半半互相制衡。
咁買乜？好多人讚落實混改「好快」。咁快，係因中移動已越贏越遠，要追，就要快籌錢鋪網追。而中移動亦瘋狂更新個網。所以要買，就一定買設備股，基金都知，所以中興（763）今年已升五成。不過做塔上接收器嘅摩比（947）就因市值太細被遺棄。而最振奮，就係佢喺6月尾中移動最新一輪投標，成接收器最大供應商，地位躍變龍頭。
呢兩年摩比收入、股價走勢，就好似2011年尾之後兩年。跟住就喺2013年尾因4G訂單出，三個月升一倍。佢十日前出咗份盈利跌八成嘅中期業績後，開始不斷回購，股價係咁升。2017年尾，到5G，混改後啲錢將湧出，公司已一注獨贏。你呢？
孫柏文
獨立股評人
http://www.fb.com/shuen
本欄逢周二刊出
孫柏文
金手指 - 孫柏文 舊文
來源 source: http://hk.apple.nextmedia.com
