貴金屬股發圍
2017年09月05日
北韓試爆核彈，據稱去到氫彈級數，對於佢咁樣出招，本來好高姿態嘅總統特朗普都好似有啲啞火，無再講自己點忿怒。平壤堅決裝上核子牙，本來試衝兩萬八千點嘅港股開市即跌。
北韓射完導彈，周末整多劑試爆氫彈，朝鮮半島緊張局勢再升級，陸羽仁同有料嘅政經猛人傾
起，佢好直接咁話，兩邊雖然殺氣騰騰，實情戰爭出現機會有限，皆因兩國固然知道打仗機會成本好高。美國要打北韓，隨非有把握一招致命，否則後果不是盟友日韓可以承擔。然而，如何能一招制命就難有善策，美國要出動核武，造成大量人命傷亡，固然會為世人詬病，而且核爆污染，飄向四鄰的南韓、日本、中國或俄羅斯，這些國家不是親密戰友，就是國際強國，不是隨便可以犧牲。
特朗普利金價
猛人還提到，南北韓停火，至今未簽署和約。當日停火的協訂，全稱應是《朝鮮人民軍最高司令官及中國人民志願軍司令員一方與聯合國軍總司令另一方關於北韓軍事停戰的協定》，即是參與為四方，若然停火失效，戰爭再臨，理論有可能把內地都捲入，這也是要考慮的軍事政治風險。如果按照呢個講法，美國另一個選項，係面對現實，明白而家面對緊嘅係一個核子國家，坐低同佢談判。
金仔搞核試，震散亞洲股市。瑞銀財富管理發表報告指，美國與北韓關係可能已進入數十年來最緊張時期，故將六個月投資期內，美朝爆發軍事衝突的機會率，從低於10%上調至10%至20%。對正佢嘅南韓，首爾綜合指數全日收市報2329，跌28點或1.19%，隔住一個海嘅日經平均指數收報19508點，跌183點或0.93%。唔知係咪大家覺得阿爺手瓜夠硬，A股不跌反升，上證指數收報3379點，升12點或0.37%；深證成指報10962點，升82點或0.76%。其他亞洲股市受震，港股都難倖免，午後最多跌290點，低見27662，尾市跌幅收窄，恒指收報27740，跌212點或0.76%；國企指數收報11182，下滑102點或0.91%，成交金額877億元。
係呢啲市況，貴金屬股通常都造好，中金國際(2099) 勁升8.3%，報16.54元；靈寶黃金(3330) 升7.5%，報1.72元；中國白銀(815) 升7%，報1.7元；招金(1818) 升4.4%，報7.13元；紫金(2899) 升1.3%，報3.03元。
早前陸羽仁話金價向上，金股相比落後，係北韓核試下，金股升幅明顯。從後市嚟睇，北韓核戰引發新韓戰嘅機會唔會咁大，但朝鮮半島形勢仲係有炒作空間。但對金價嚟講最重要嘅，係特朗普上台後，美元幾乎即時見頂，而家大家見到佢上咗台，政策基本上都不利美元，包括佢係控制赤字方面，基本上舉手投降，美國搞出水災，特朗普想將救災同債務上限提高一齊過國會，反映佢對赤字控制嘅態度都係博博朦朦。同奧巴馬另一個唔同，就係奧巴馬想懶理他人死活，總之就係海外撤兵，減少軍費開支，特朗普而家就係阿富汗戰場上變咗態度，唔單止唔撤，仲話想擴大戰爭㖭，係共和黨布殊執政年代，美國赤字大增，美元完全乏力，睇嚟特朗普呢樣嘢都會似布殊，對於金價嚟講，呢個大方向仲緊要過金仔核試。
內地郁手整治虛擬貨幣
另外，中國政府要求停止對首次代幣發行融資(ICO)活動，拖累比特幣急跌。據內地火幣網顯示，比特幣跌穿2.7萬元人民幣，跌逾1400元，急挫半成。上星期炒生產挖幣顯示卡嘅栢能(1263) 可能有影響，但栢能股價昨未見異樣，收報4.24元，跌2.5%。
陸羽仁
金融High Tea 舊文
來源 source: http://hdfin.stheadline.com
