財經評論：養樓防老好過買股
■趁後生搵租客幫你供樓，廿幾年後月月收租過活就最理想。資料圖片
買樓等退休收租難？我話買股等退休更難，自訂甚麼藍籌組合，挑選不同板塊，睇市又睇勢，我睇，不如買樓更實際。
說辣招重稅、買第二套房要交重稅？早已被投資者借用阿仔阿女的首置客名義，一招搞碎。單身寡佬、無伴
終老，或許高呼政府豁免長者買樓印花稅，但從政者不會看不到子女借父母名買樓的後果。15%稅很重？如何重，也不及子女長大成人養兒又養兩老那麼重。
睇過大埔太和中心、翠怡花園，以至沙田花園城的三百幾呎兩房租盤，不謀而合，業主都是七老八十的阿婆，早年買落用來退休收租。坦誠相對，婆婆早已供甩層樓，月月收一萬幾千，不用子女養自己。
近年百幾呎的劏房劣評如潮，但你有你鬧不人道，佢有佢收幾厘回報。剛入夥的尖沙嘴AVA62上月錄逾6宗租賃成交，月租1.2萬元至1.5萬元，扣除大嗱嗱每呎4.5元的管理費，回報率都貼近3厘，例如高層B室，實用面積206方呎，月租1.3萬元，2015年一手買入價498萬元，扣除每月927元管理費，回報率都有2.9厘。另一個中層A室，實用面積253平方呎，一房間隔，月租1.5萬元，2015年一手買入價502萬元，扣除每月1,138.5元，回報率去到3.3厘。
趁後生搵租客幫你供樓，等到廿幾年後，供滿會，月月收租來過活，日日飲茶刨波馬，得閒湊孫就樂滿家。
記者：陳家雄
財經評論 舊文
來源 source: http://hk.apple.nextmedia.com
