中環在線：帶孫女去馬場
超人：拍拖咋
■李嘉誠前日拖埋21歲孫女李燕寧到馬場一遊。
呢兩日全城熱議嘅花邊新聞，當然係「超人」李嘉誠拖埋21歲孫女李燕寧（李澤鉅長女）到馬場一遊啦！一來超人係馬場稀客，近20年絕少現身馬場；二來李家一直將第三代收得好密，孫女可以話從未以真面目示人，日
前首度露面，大家先知佢咁秀氣。
正當大家八卦緊何解超人忽然帶孫女出場，有人就報料話，超人噚日打開報紙（係呀，超人仲睇報紙㗎）見到咁多人寫，都嚇咗一跳。聽聞佢只不過係打算帶孫女去馬場見識，拍拖食餐晏仔，皆因孫女未去過馬場，成件事就係咁簡單。
換句話講，佢哋並非應任何人邀請，亦冇約過任何人咁。雖然成件事聽落有啲莫名其妙，any肥，超人同孫女拍拖呢件事，係好sweet嘅。
超人又點止對孫女好，佢對全港應屆DSE考生都好好㗎！講緊佢旗下李嘉誠基金會早前宣佈派錢畀明年考DSE嘅學生哥，第二期5,000蚊現金支票噚日喺位於屯門區嘅學校開始發放，逾9,300名學生受惠。
但基金會伺機詐型，話上次派完錢後，向受惠中學與考生派發問卷，可惜喺「多番呼籲大家積極回應下仍只有33%的回收率」，令人焦慮。咁又係嘅，畢竟基金會講明，問卷結果會影響成個計劃嘅延續性同方向，仲講明派埋今次會再調整成個計劃方向，咁今次同學仔記得畀心機填問卷呀。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.finance.appledaily.com
