財路：銀證抵買博食尾糊
■銀證今年9月盈利3.65億元，同比增長26%，係今年下半年嚟首次，有turnaround味道。互聯網圖片
上證綜指創近廿二個月高位，銀河證券（6881）打橫行咗近三年，比起2015年大插插後反彈位差冇幾，明年預測PE調整到得8字頭單位數，抵搞。
銀證今年上半年
盈利6%到21億元（人仔．下同），尤其第一季，內地整頓證券業，內地股市有起色，內券傭金收入大減，銀證亦唔例外，呢瓣收入跌咗近30%，到28.6億元，但得力其他經營支出同利息支出減省，銀證盈利未見大跌，已經唔錯。
又經過上半年艱苦期，銀證啱公佈冇耐，今年9月盈利3.65億元，同比增長26%，兼係今年下半年嚟首次，有turnaround味道。又據高盛發報告講，銀證喺所有券商當中，經紀收入瓣數佔比最高。
中證協上月中開會，討論設定傭金價格底線同叫停傭金戰，呢壇製作，若果真係落實，對銀證受益就最大。再講，內地兩市兩融餘額，到上星期上番9,900億元樓上，內地股市有番起色，魚缸有水，對銀證亦係好事，銀證今年有機食尾糊，全年成績單改善。
場內專業預測，銀證今、明兩年EPS0.64港元同0.7元，現價預測PE10.8倍同9.8倍，兩年預估PB得0.9倍同0.84倍。場內同級數內券，今、明兩年預測PE12.6倍同11倍，預估PB1.3倍同1.2倍、中信證券（6030）預測PE16.4倍同14.2倍、PB1.2倍同1.1倍、招商證券（6099）預測PE13.4倍同11.8倍、預估PB1.2倍同1.11倍，銀證PE、PB，都係至抵搞！
買銀證，當追番上行家明年預估PB1.1倍水位，現價6.85元都講緊要升30%，到近9蚊水位，目標價比起2015年瘋牛期14蚊，仲係差咗一大截！
錢雋
細價股專家
本欄逢周二刊出
錢雋
財路 - 錢雋 舊文
來源 source: http://hk.finance.appledaily.com
