智取大市：港股又小奇蹟？
■恒指下周換馬，騰訊比重降至10%，會引嚟潛在沽壓，但對短期超強趨勢難有改變。 資料圖片
莫非噚日又係小奇蹟日？恒指近期每次恒指9小時RSI跌落20左右，就係短線見底回升之時，噚日午後最多跌成351點，當時睇落風頭火勢，少啲定力、又或者揸重牛證Call輪都
就嚟被震走。呢個時候，9小時RSI正正落到20，跟住又再一次快速反彈。
回顧返前一次恒指9小時RSI跌到20，就係11月6日嘅小奇蹟日，跟住恒指V彈一去冇回頭，今次情況係有啲似。港股目前仍然係中長線升市途中，仲要進入全民皆股嘅白熱化階段，走勢應該係最易估算嘅一段，毋須嚇嚇猜忌做緊假突破，揸實強勢股、做簡單的事就最劃算。
領袖股騰訊（700）同平保（2318）目前波幅相比11月6日時更大，趁勢炒上嘅話，未來幾日可能出現比之前更大波幅。其中，騰訊之前四連陰，調整時陰燭身比較細，而今日拗腰反彈，又出現較長陽燭，動力仍然強勁。對於今年升咗超過一倍、市值4萬億嘅巨無霸嚟講，呢種動力確實唔講得笑。佢嘅好處係，走勢少有呃人，係轉強就轉強，冇技術陷阱就自然較易坐得穩，只要12月上旬港股趨升，騰訊始終難以捨棄。12月4日恒指換馬，騰訊比重降至10%，會引嚟潛在沽壓，但對短期超強趨勢難有改變。
晉佳
http://fb.com/advanceguy1
本欄逢周一、三、五刊出
晉佳
智取大市 - 晉佳 舊文
來源 source: http://hk.finance.appledaily.com
