收市閒情：現實版《大時代》
■曹貴子今次出事，同David Webb喺隆成供股時輸咗幾千萬有關？ 資料圖片
江湖之事，一向跟紅頂白；一代梟雄，都有一沉百踩之時。人稱「醫生」的殼股大玩家曹貴子，近期可以話係大大大鑊。
人性嘅體現以外，如果理清成件事個故事脈絡，戲劇震撼效果，絕對可以
拍到一部《大時代》式嘅電影。
劇情一：股壇另一殼股高手「粉哥」同股壇長毛David Webb，因為一隻隆成（1225）交手。隆成大折讓供股，David Webb變相中伏，聽講Webb當年因為隆成輸咗8位數。去到今年Webb就出咗50隻不能買的港股名單，一次過爆曬隆成嘅關連公司，觸發「塵爆」事件！
講到呢度，你以為呢一場腥風血雨嘅戰爭，就算要傷，都係呢兩個男人之間嘅事。不過，事情往往𥧌迴路轉，當日細價股股災，涉事者當然唔執輸一齊沽，結果個價越質越低，累到行家們都俾人質死。情況就好似，有隻船就快沉，船主就掟同伴落海，點知一掟，水花衝擊力太大，搞到隔離架艇反埋！至於架船呢？船主繼續好食好住。
數返轉頭，今次醫生出事，一切源於David Webb輸嗰幾千萬。一代殼王GG，最後因為幾千萬呢啲濕碎數，仲要係人哋嘅濕碎數出事，你話呢？邊個估到？
劇情二：本來劇情去到呢度，人物關係已經好亂，點知呢個時候。蔡志明突然高調接受訪問，話醫生「呃佢」、「佢今次錯得太離譜」、「十世冇好死！」最精彩一幕係，竟然拉到去李嘉誠度，話曹醫生2005年同佢講，李嘉誠「等錢使」有意退股康健（3886），所以佢就接貨。
「李嘉誠等錢使」呢句本來已經好震撼，就好似你同人講「陳冠希冇女溝」一樣咁莫名其妙。好啦，咁究竟當年李嘉誠沽貨後可以拎返幾多錢，睇返2002年嘅紀錄，只係3,900萬。以呢個講法，即係李嘉誠當年等3,900萬開飯。
千頌C
http://fb.com/winbigwok
本欄逢周三刊出
千頌C,曹貴子,殼股,塵爆,David Webb,李嘉誠,等錢使,_mt_投資
千頌C
收市閒情 - 千頌C 舊文
來源 source: http://hk.finance.appledaily.com
