【實力取勝】贏一齊贏、輸一齊輸（陳承龍）（第153期）
2017-11-30 17:30:01
人總係會經歷病，只要病完好返，咪冇事咯。小弟之前病咗一輪，又情緒問題又瞓唔到，呢排作息定時，做運動，有時仲跟圖太郎行山，同事喺公事上又幫咗好多忙，令到我可以專心養病，所以咁快好返，
再戰股壇、輪壇同牛熊證壇。
就好似截稿今日（28日）咁，港股真係小奇蹟日，兩隻大嘢騰訊（00700.HK）同平保（02318.HK）做咗低位之後狂彈，好多同事平咗啲牛仔後，都追返轉頭，其實呢幾日真係受期結因素影響，相信過兩日期結後，應該會夾到癲，有淡倉、熊證嘅朋友，真係要避一避。後市小弟真係好有信心，繼續做長期大好友，除咗揸咗唔少騰訊、平保、滙控（00005.HK）同南方A50（02822.HK）牛仔之外，協鑫新能源（00451.HK）、比亞迪（01211.HK）同廣汽集團（02238.HK）都要留意，係小弟呢期心水。
仲有呀，呢期邊啲熱門新股，真係可以望多兩眼。就好似1957 & Co（08495.HK），佢間泰國餐廳Mango Tree同意國菜Paper Moon都幾知名，小弟都起初竹都半信半疑，期後一連三晚食曬呢兩間加埋居酒屋「權八」，佢人流又多，食物又唔差，仲係走中檔路線，見佢啲客都斯斯文文之餘，仲明顯係高消費嗰一群，真係幾有錢途，同之前好多走大眾路線嘅上市食肆唔同。食完三晚之後，小弟都落咗張「頂頭槌」飛，希望分到多啲，同大家贏就一齊贏，輸就一齊輸。12月5日8495上市嗰日，希望個市就，股價有好成績，我哋一齊賺多少使費，買份好啲嘅聖誕禮物畀自己同家人。
仲有一個月就2018年，眨下眼《港股策略王》就嚟做咗三年，由當初得一本財經周刊，變咗有網站同報價app，仲有埋直播室，全天候陪住股民炒股，變化真係好大。下年，小弟敢擔保，策略王會不斷變革求新，令大家覺得我哋更過癮、更有感染力。
實力取勝 - 陳承龍 舊文
來源 source: http://www.winmoney.hk
