金融High Tea 2017年11月30日
領展賣產秤身家
2017年11月30日
港股呢排置身冷暖水交界，美股隔晚炒稅改過關大升256點，但內地A股繼續呆呆地，恒指北水壓倒西風，無得跟住華爾街炒上。
內地股市呢排獲利同防險意識高漲，投資者繼續沽售績優股同半新股，雖然有傳阿爺限制大手沽貨，但資金缺乏追貨意欲，唔排除上證綜指要喺3300點左右試吓底(現時3337點)。
下個月美國加息已成定局，係中港股市觀望理由之一，但呢排本地物業市場不乏超級成交。領展(823) 啱啱又宣佈出售旗下十七個商場物業，總代價二百三十億元，出售予以基滙資本為首的財團。呢個作價較今年九月底估值高出約百分之五十二，亦比市場原先預計為高，交易將獲得淨收益七十四億元。
好消息見光股價要唞唞。
呢次領展出售物業組合中，其中一個係年前買入的現崇山商場。這個物業係少數唔屬於房委會分拆出來，本由嘉里發展，領展喺區內有黃大仙中心等商場，本來係想買埋現崇山商場一齊搞，但結果依家都係沽番出去。
中環茶友話，過去領展搞商場改善有一手，皆因以前政府做得太渣，貨比貨自然突出左領展管理層有料到，但嘉里係私人公司，一早用左商業手法經營，領展想買嚟增值，又邊有咁易？呢個故事的啟示係，領展沽左貨套現想做發展商，佢要喺個個都係強手的私人發展商市場賺大錢，恐怕無搞房委商場咁易喎。
茶友話，呢次領展大手沽出商場，另一個可能係從政治考慮。過往佢無論重新包裝抑或拆售商場，都惹來批評抗議。本來，公司股價連年上升，公司高層荷包腫脹之餘，應該有形有款，但因為呢排成日被人鬧，搞到要低調潛行，仲被現任特首林鄭批評佢地係三座大山之一。依家大手沽貨，等如減少啲包袱，咁做或者係希望可以被人鬧少啲。
公佈左大手交易消息後，領展股價創左72.3元新高，但收市差不多打回原形，收報70.35元，升0.5%。領展出售近一成物業，變相等同秤身家，佢資產帳面淨值原本估計約係62.5元，按最新交易價高過估值52%計，每股價值係95元，依家市價折讓係35%，只能講係不過不失，比較可取係佢派息有3.2厘，加埋今次套左大筆現金，未來可分派利潤暴升。由於佢股價之前已經衝左一段，加上下個月加息對資產股唔係咁有利，相信好消息暫時已消化左八八九九，如果想買嚟收息，最好等佢回吓先。
滙控中銀借拆息高玩逆市
美股升得勁，A股午後跌完企穩，上證指數收報3337點，微升4點；深證成指收報11082點，跌9點。港股喺窄幅波動下難逃下跌，恒指收報29623，跌57點；國企指數收報11647，下滑57點，成交1096億元。藍籌中大笨象滙控(005) 呢排興玩逆市，其他大股多數乏力，佢就升1.4%，今次跟美股炒，收報78元，中銀香港(2388) 仲急升左4.6%，收報38.9元，早前我話中銀香港唔應該咁差，今次佢有番啲表現。呢排本地拆息升破1厘，對地產股唔係咁好，但就有助銀行拉闊息差，美股下個月加息前，如果大市玩吓炒落後同換馬，咁本地銀行股仲有機會湧高啲。
陸羽仁
金融High Tea 舊文
來源 source: http://hdfin.stheadline.com
