智取大市 - 晉佳 2017年11月9日
智取大市：下階段望實美滙
■美國聯儲局幾可肯定12月加息，主席一職人選已定，稅改成為下個變數。資料圖片
騰訊（700）五連陽過後，出現大成交嘅射擊之星，往績顯示強如騰訊面對呢種技術走勢，後市都要唞唞氣。唔靠騰訊嘅話，恒指升得冇咁快，但市況未必因而轉靜，最重要睇嚇有乜板塊能夠接力炒得上。
科網股能夠率先爆上，增長能見度高固然受投資者歡迎，iPhone X反應理想隨即谷起瑞聲（2018）股價，短期爆升幅度高，反映市場胃納仍夠強。至於其他板塊有冇機會接力，有部份受外圍因素影響較大，例如中港地產股、商品股等等，受美滙走勢影響，喺近個幾月美金反彈之下，上述板塊就齊齊進入調整。
美國聯儲局幾可肯定12月加息，主席一職人選已定，稅改成為下個變數。美滙近期反彈至95水平，進入密集阻力區，但美金走勢一向難測，呢一刻可先備忘美金升時跌少少、美金跌時升多多嘅股票，中鋁（2600）係其中選擇。
交待一下Tapestry（Coach，TPR）季績，EPS0.42美金，跌7%左右，但勝預期，Coach同店銷售跌2%，估計收購Kate Spade後，過往敵對嘅兩個品牌，會減少惡性競爭，盈利能力有望同步好轉，Coach銷售有機會，估計盈利能夠止跌回升，估計股價亦已見底，改個衰名、取消第二上市後，睇嚇係咪有運行。
晉佳
晉佳
智取大市 - 晉佳 舊文
來源 source: http://hk.finance.appledaily.com
