金融板塊未開放先炒作
2017年11月17日
港股周三插咗300點，噚日升番167點，一上一落，移燈換櫈，科網新股炒風收斂，改由內險股代領風騷。
內險股開市已經爆上，領軍嘅係近排強勢嘅平保(2318) ，內險股爆升有兩個理由，一個係內地股市打咗一輪底，呢排好似有啲想突破，滬綜指喺3400點左右徘徊，個別板塊
受追捧，明年六月份A股入摩，臨近年底大陸股市開始築底，咁對投資大陸嘅內險股都有支持作用。
外資期望可以獨食
另一個影響大啲嘅係，早前美國總統特朗普訪華，內地提及會加快開放金融業。雖然外媒事後分析，認為呢類訪問取得嘅成果，需要好長時間先能夠實現，但內地股市就先炒炒呢個概念。炒作概念之一係隨住中國金融業對外開放力度加大，海外機構會加速佈局中國市場。
除咗同合作夥伴設立合資公司外，目前愈來愈多外資機構設立外商獨資企業(WFOE)，進一步開展同中國市場相關嘅業務。有消息話先後有七間機構嘅WFOE完成私募基金管理人登記，其他一啲機構亦通過WFOE嘅設立，進一步構建中國業務版圖。摩根士丹利全球首席執行官James Gorman呢個星期嚟咗香港，行程中佢都話大摩將爭取增持中國內地合資投資銀行嘅股權至51%，咁樣可以喺公司取得主動權。
內地開放金融市場擺上議程，真正做起上嚟相信會好小心，依家市場先講緊係港股嘅定價權，即係邊個可以將香港變成佢嘅主場。過去外資喺港股翻手為雲、覆手為雨，呢個情況近年開始改變，尤其當中港通啟動後，內資對香港影響力日增，依家講緊內地會加快金融發展，唔排除外資對內地金融資產嘅興趣會高番啲。
保險板塊大搶風頭，平保急升5.6%，報收77.85元，平保喺本業係龍頭，發展速度同增長最快，基本因素已經秤先啲，加上佢定位自己係科技股，大力投資眾安保險(6060) 、陸金所呢啲以科技驅動嘅金融平台，成為內險股火車頭，呢個板塊一郁佢就行先。國壽(2628) 噚日都漲2.5%，收報26.9元；友邦保險(1299) 都升逾1%，收報65.3元。
周三公佈咗業績嘅騰訊(700) 表現唔錯，收升2.3%，收報391.8元。好多大行繼續唱好佢，花旗話，騰訊第三季整體收入進一步加快，預期豐富及多樣化內容將推動變現能力，集團嘅核心生態系統包括社交媒體、內容及金融服務，將會喺內容提供強化，包括遊戲、視頻、音樂、文學、直播及新聞內容，作為集團兩大社交平台QQ同微信變現化嘅主要策略。花旗將騰訊目標價上調至482元，相當於2019年非通用會計準則(non-GAAP)預測每股盈利13.78元嘅35倍。喺內險股同騰訊帶動下，恒指收報29018，升167點，叫做重上29000關；國企指數收報11533，漲121點，成交1139億元。
雙運大賣乾炒牛河
至於同騰訊有關嘅新股易鑫(2858) ，開報10元，高低位分別見10.18元及8.1元，全日報收8.12元，較發售價7.7元只係上升咗5.5%，最高升過32%時走唔切，最後得番粒糖，炒新股進銳退速，易鑫成交8.33億股，唔計手續費每手500股帳面賺210元。同日有新股破咗底，衫股榮威國際(3358) 收報3.32元，較上市價4.38元，低24.2%，唔計手續費每手500股帳面勁蝕530元，亦有做LED燈嘅創板股濠亮環球(8118) 升咗一倍，收報0.6元，唔計手續費一手8000股勁賺2400元。上市第二日嘅雙運控股(1706) 再見炒作，收報1.42元，升70%，咁升法明顯係乾炒牛河，已脫離基本因素，同時反映新股熱已由人人有份嘅抽獎期，進入咗大戶圍貨嘅炒作期。
陸羽仁
金融High Tea 舊文
來源 source: http://hdfin.stheadline.com
