Money Walker：對儲局新主的期望
■耶倫在任時準確向市場傳達儲局幣策方向，未知接班人喺對外溝通方面是否有耶倫的功力。 資料圖片
早前安聯首席經濟顧問埃爾埃利安（Mohamed A. El-Erian）分析指，聯儲局新主席上任後首12個月幣政唔會大變，因儲局
在縮表及利率政策方面已猶如接近自動駕駛。
筆者大致認同上述講法，美國今明兩年幣策方面最大變化，頂多就係由預計出年全年加息三次變成加息四次，不過有一點不可忽視，就係幣策不變唔等於儲局主席好得閒，在位者仍要兼負起向市場傳達幣策前景嘅重任。
當市場僅僅聚焦於儲局新主席孰鷹孰鴿，對金融業監管取態如何，筆者更關心嘅係呢位主席嘅溝通能力。須知道投資者容易對儲局主席言辭有過度解讀，市場會從儲局主席言辭推敲幣策前景，而有關預測又會左右美元與美債息強弱，繼而衍生出各類有關股市吸資或走資嘅想像。
萬一新主席講嘢唔夠謹慎，又或者選擇行聯儲局前主席格林斯潘嘅含糊其辭路線，都有機會觸發市場千般揣測，激起股、匯、債波動，2013年伯南克（Ben Bernanke）時代嘅「收水驚魂」（Taper Tantrum）就係一例。
執筆之時，市傳耶倫（Janet Yellen）不會連任聯儲局主席，耶倫在任時準確向市場傳達儲局幣策方向，減低咗外界對收水、縮表同加息呢啲大動作嘅不必要揣測，未知耶倫接班人喺對外溝通方面是否有前任功力。
El.
http://fb.com/moneywalkerhk
本欄逢周三刊出
El.
Money Walker - El. 舊文
來源 source: http://hk.finance.appledaily.com
