中環在線：唐業銓當選CPA新會長
■唐業銓（中）噚日當選新一屆會長。
香港會計師公會（CPA）今年選舉火花四濺，先有過百名會員聯署提出普選會長等訴求，再有擔任理事多年的龔耀輝申請參選會長，卻疑似被DQ（取消參選資格）。眾說紛紜之下新一屆會長噚日終於出爐，由原任副會長、德勤中國全球
金融服務業審計及鑒證合夥人唐業銓當選，據聞新一屆理事會疑在輿論壓力下讓龔耀輝參選，可惜佢再次落敗。
查實龔耀輝2014年底都參選過會長，當時佢已經做咗9年理事，戰意十足去參選，點知輸畀時任Big4嘅羅兵咸永道合夥人何超平。落選2015年會長後，龔耀輝一度意興闌珊，2016年連理事都唔再重選。
龔耀輝改選理事再落敗
點知今年就因為咁爆出「資格問題」，接近龔嘅消息指，新一屆理事會本來話，佢參選會長前未有連續兩年出任理事，所以唔符合資格。但噚晚又話佢有份參選。消息人士認為，理事會係基於輿論壓力讓步。雖然今年同一陣營嘅「民主進步會計師」5名成員成功進入理事會，但21名理事投票後，龔耀輝仲係唔夠票。
新任會長唐業銓就話，明白會員有不同訴求，表明之後會加強公會透明度，希望令會員更了解公會運作情況。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.finance.appledaily.com
