要防減稅兩刃劍
2017年12月15日
美國聯邦儲備局議息，以7比2通過加息0.25厘，聯邦基金利率上調至1.25厘至1.5厘，預告明年加息3次。當中反對的兩票是由芝加哥聯邦儲備銀行行長及明尼阿波利斯聯儲銀行行長投下。
或增多少加息力度
會後聲明指，勞動市場新增職位繼續強勁，失業率進一步下滑，通脹率短期內
維持於低於2%的目標水平，預料目標水平中期內維持。由於加息已在市場預期之內，表面睇消息已經消化左，跟住係咪萬里無雲呢？好多分析家依家焦點，已經轉移左去明年加息多少次，以及息口幾時會見頂，當中美國減稅，就成為幾難預測的不明朗因素。
陸羽仁同金融界猛人傾起，大家都覺得香港雖然係金融中心，但對美國減稅可能產生的影響講得唔係咁多，呢樣嘢可能同港人覺得美國總統特朗普行事無定向風兼口沒遮攔，唔係太相信佢。不過，特朗普呢次減稅就真係大動作，可能係佢令美國再強大的政治宣言中，最有實效的一招。
今次聯儲局會議，係耶倫做主席任內最後一次，來年就會輪到鮑威爾接任。外界原先預期美國明年會加息三次，合共0.75厘，但依家好多分析家認為，美國減稅對經濟同通脹產生的刺激作用，可能令美國加息高過原先估計，或者可能需要加息四次。美國如果經濟因為減稅變得強勁，咁利息可能就會升得高啲先至見頂。
對利率影響只係減稅方案當中一面，外界另一個關注係對跨國公司將海外公司將盈利調回本國提供的稅務誘因，究竟有幾大威力。猛人話，美國雖然已經終止左量寬，但歐洲同日本仲係印緊銀紙，如果美國扯走資金，咁就可能產生牽一髮而動全身的影響。
對於美國呢次減稅，會對全球經濟格局和中美競爭力如何產生根本性影響，內地高度重視，有傳北京已展開全面調研，研究左一套應對方法。
由於內地同美國體制不同，北京唔可以用美國的方法去拆招。現時普遍講法係要全面削減綜合成本，意思係話內地經濟結構主要由國企組成，減稅對佢地嚟講唔係提升生產力的有效方法，可以考慮的方法之一是加強同加快國企改革，包括引進民企資本。
由於美國減稅方案仍有細節待定，加上企業對措施真正反應尚待觀察，但大方向係美國減稅對美股同美元有利，但呢種效應係兩刃劍，對各國嚟講唔多唔少係此消彼長，即係美國好左，其他國家可能就會受壓，呢點係明年全球股市要留意的因素，尤其當人人都覺得安全時，反而要小心美國減稅會唔會帶來退潮效應。
恒指喺美國加息前偷步炒上，消息出街後大市整固，銀行股略為調整，滙控見過80.4元後微跌0.45元，跌0.5%，收報79.5元。地產股加息下續彈，最勁係隻新地(016) ，收市升左3.5元，升3.2%，收報127元，似係壞消息兌現的反彈。
手機設備股壓力未消，舜宇光學(2382) 急跌4.1%，收報103元。大市變動唔大下，恒指收報29166，跌左55點；國企指數收報11531，升11點，成交1065億元。議息之後，市場無乜重大議題，相信大市假期氣氛漸凍，基金經理賺夠開始放假，個市開始進入自由浮動狀態。
海航獲八大銀行支持
臨近年尾，內地企業開始對來年業務做預算。有消息指近年積極在境外收購的海航，就與內地八大銀行就2018年授信事宜進行商談，目前獲得各金融機構授信總額超過8000億元人民幣，還有3100億元授信未被使用。國家開發銀行、中國進出口銀行、中國銀行、農業銀行、工商銀行、建設銀行、交通銀行、浦發銀行等八家國內政策性及商業銀行均為海航「護航」，支持海航發展。
海航集團副董事長李先華仲喺授信商談會上指出，集團今年來在航空旅遊、現代物流、現代金融服務等主業生產經營持續向好，旗下子公司和收購企業整合協同效益不斷增強，近兩年對外投資項目收益頗豐。海航在香港有多間上市公司，又擁有啟德大型項目，所以佢獲八大銀行祝福的消息，都好多人關注。
陸羽仁
金融High Tea 舊文
來源 source: http://hdfin.stheadline.com
