魚樂無窮：大市喪跌求生術
■港股沽盤湧現，50天線由鑽石能量底變成豆腐渣。資料圖片
港股沽盤湧現，50天線由鑽石能量底變成豆腐渣，連2015年大時代高位亦一併失守，慘絕人寰。上星期起陸續收到不少求救message，問高位有貨應該點算好。對於不熟悉嘅股票，我嘅答案幾乎一式一樣︰有信心再
創新高嘅就繼續坐，冇信心嘅就減磅。
冇計，每個人承受風險能力不同，倉位又不一樣，好難用同一把尺量度，我自己揀股票，通常都會有催化劑支持，如果有數得計就仲正，諸如股息率、回購價，上車落車有曬指標，真正做到不求人。
指數由高位回落近2,000點，損傷難免，但最傷往往於最恐慌一刻全面清倉，然後個市反彈甚至見底，到時又一定唔敢追，傷荷包更傷心。
點樣可以避免呢個情況發生？在此不厭其煩講多次︰每日紀錄低股票倉位，計清楚每日及累積賺蝕幅度，當發現倉位利潤不尋常地連續下跌，幅度又比正常大時就要小心，因這正是市況逆轉的先兆，唯一可以做的，就係不留手地減磅。
有追蹤我fb嘅戰友都知道，日前沽出鴻騰（6088），其中一個原因正是倉位盈利跌至警戒線，因此昨日已輕裝上路，損失亦大大減少。每日用幾分鐘時間入數，即可多一個關鍵指標，何樂而不為呢？
唐牛
http://fb.com/tongcow88
本欄逢周二、四刊出
唐牛
魚樂無窮 - 唐牛 舊文
來源 source: http://hk.finance.appledaily.com
