【實力取勝】期指高水呃鬼我（陳承龍）（第154期）
2017-12-7 17:30:13
11月21日，夜期一開就高見31341點，比現貨高水1500點，好多股民包括小弟都好興奮，諗住52000點我嚟啦，32000點在望，呢舖大牛市仲唔係堅嘅？事後係點，大家都知，真係一殼眼淚。
細諗原因，今次回調其實係有跡可尋。
股巿係一個永遠都有嘢畀大家學嘅地方，就好似今次咁，點解夜期會突然高水咁多點？原因唔排除係淡友已經輸到痛，趁夜期時段成交少，突襲個market，瘋狂買期指以平淡倉，所以導致夜期高水1500點咁誇張，而原先低位做好倉嘅好友見突然咁多買盤，咪高位平曬啲淡倉咯。淡友投降，短時間再冇夾上去嘅誘因，大市跌真係一個好合理嘅結果。好多牛證喺呢個跌市中壯烈犧牲，有口痕友仲話寵物善終服務好生意到供不應求（因為死好多好友養嘅牛牛），所以呢個時候，就要控制下衍生工具嘅注碼，等有勢之後，再同佢搏命都未遲。
只要唔好放棄，市場一定有機會。截稿前，有湯森路透（Thomson Reuters）旗下出版物IFR報道，平保（02318.HK）旗下陸金所或將於2018年喺香港上市，集資高達50億美元，即係約390億港元。消息指陸金所委託中信證券、花旗集團、摩根大通、摩根士丹利同高盛保薦人，不過陸金所發言人拒絕就公司係咪委託五家銀行搞上市評論，仲話「目前冇時間表」，但外國傳媒吹得風，就真係空穴來風未必無因。小弟相信平保中長線真係好可睇過一線，目標100蚊不是夢，而且爭25蚊左右啫，北水一返嚟咪又一支箭咁衝上去。
此外呢，《港股策略王》精益求精真係人所共知，今期有兩個新欄目，不過，只係舊欄目改名，王牌欄目「今期要睇住」變身做「贏在北水前」，開宗名義搵啲北水未掃嘅股票嚟買，至於「殼股天地」會改名做「黑馬天地」，以迎合更多有爆升機會、令大家識於微時嘅好股票。嗱，大家唔好噓呀下，多多支持小弟班同事呀。
實力取勝 - 陳承龍 舊文
來源 source: http://www.winmoney.hk
