美國減稅插港股
2017年12月07日
港股來個小股災，單日插618點，美股呢排炒稅改方案通過，恒指就人升佢跌，當中以科網股同手機設備股沽壓尤大，呢啲今年吸引唔少股民高追的股份昨日再大插，市場畀咗嗰理由，就係美國稅改方案對佢哋不利。
稅改不利手機設備股
科技相關股如騰訊(700
) 昨日跌2.7%、瑞聲科技(2318) 跌4.2%、舜宇光學(2382) 更大插12.5%，另外熱炒汽車股吉利汽車(175) 亦跌8.4%，普通股咁跌法已有少少災味，若然係炒衍生工具玩牛證，好多已經直接出局。
升得高、調得急，本來好正常，唔需要有乜理由，但大行做生意都要搵概念㗎。第一個概念係換馬，外資行里昂早前就發表報告，聲稱新經濟股份升咗咁多，再上升幅度有限，所以改為看好舊經濟股份，認為今年亞洲科網股升逾數倍，高估值只能在業績大勝預期下才能維持，該行以騰訊為例，指出市盈率已創新高，市值逾5000億美元，很難再翻倍，其他新經濟股好似瑞聲、吉利都有相同情況。
第二個跌市概念，係美國稅改影響，首先係減稅有利舊經濟股多啲，因為佢哋納美國稅多啲，科網股喺全球賺錢，減美國稅對佢哋盈利好處無咁大。同時，減稅之後可能有部份製造業回流美國本土，對生產商好似手機設備股會有負面作用，因為手機公司可能自行在美國建廠，所以呢類股份就俾人係咁插，反而見到啲舊經濟股喺跌市中，調整幅度唔係咁大。另外亦要小心資金回流美國，影響亞洲市場。
中環茶友對於市場呢啲講法完全唔意外，佢早兩個月已經不停話手機設備股呢類公司估值過高，炒還炒，千萬唔好以為佢哋真係咁值錢。好似瑞聲呢啲手機股升到入咗恒指，往往就係谷爆股價最後一根稻草，因為通常佢哋市值去到咁大，估值已經偏高，加上做咗成份股後指數基金谷追，令股價偏高完再偏高，跟住就無以為繼，追捧資金一停就死。喺呢兩日呢類股份大幅回調中，見到有北水仲入貨炒緊，所以唔排除佢哋會反彈，但茶友始終係嗰句，依家佢哋估值仲係唔平，加埋插得咁勁搞到唔少蟹貨，撈貨值博率都仲係一般，都係即日鮮玩意。
喺沽盤質低重磅科網股下，恒指收報28224，急挫618點，是2016年9月以來最大跌市；國企指數收報11162，下跌322點，成交急增至1627億元。
止蝕一遲就走唔切
呢啲股份交投相應暴增，估計同衍生工具對沖拆倉有關。呢類股份升時唔少發行商推出窩輪同牛證，佢地要買正股做對沖，依家牛證打靶就拆倉沽正股，就變成滾雪球效應。炒騰訊或者其他科網股，如果短炒都要留意止蝕，中環茶友話，呢排好多人炒呢啲衍生工具，參與呢類活動純屬投機，當中特別係牛熊證，一唔睇實就好易俾人回收，見有異動就要止蝕，否則就走都走唔切。
至於大市去向，平日一跌就彈，但時近年尾，基金經理止賺心態強，回起上來勁啲，同平日不同。若然從30000點高位回一成到27000點會較吸引，現價有啲雞肋。想買大股都可以等跌深少少才出手，或者分段入。
另外喺跌市中，燃氣股一度成為避風港，中國燃氣(384) 曾經炒上25.5元，可惜最後不敵大市，收報23.9元，倒跌1%；連煤氣(003) 都一度創出一年新高，收市就報15.4元，微跌0.1元，算係異常硬淨。
陸羽仁
金融High Tea 舊文
來源 source: http://hdfin.stheadline.com
