【不問價追】跌市綠洲有萬洲（小炒王梁心欣）（第154期）
2017-12-7 20:00:29
大市由高位回調2000點，到底想點呢？個個殺到死曬，仲有咩好買呀？是日推介萬洲國際（00288.HK）。
講起萬洲，小炒王同佢都好有緣，因為早前小炒王就估佢黑馬染藍，簡單邏輯就
係消費股換消費股。小炒王國推介萬洲，邏輯一樣咁簡單，就係稅改，雖然話參眾兩院有少少分歧，但大體上都有共識，好大機會聖誕節前傾得掂，企業稅由35%大幅減到去20%，以及標準扣稅額都升近一倍，小炒王相信好大機會提升企業盈利，有助企業請多啲人外就係加人工，而個人交少咗稅，更有利消費市道。係咁嘅情況下，消費股係首選，大家都應該明白點解小炒王推介萬洲國際。
講返小小基本資料，萬洲係世界上最大的豬肉食品企業，在豬肉產業價值鏈的主要環節，包括肉製品、新鮮豬肉和生豬養殖，均佔據全球首位。公司手持幾大品牌，分別係中國雙匯同埋美國嘅Smithfield，除咗呢兩大品牌，公司仲有唔少細品牌，而公司今年都積極向外收購，年初時收購咗美國本土Farmer John等多個品牌，直接打入美國西岸市場，6月嘅時候進軍歐洲業務，收購咗營運肉類加工及包裝工場的Pini Polska，年產能10萬公噸，營運零售包裝鮮肉工場的Hamburger Pini，年產能4萬公噸，正在興建的家禽加工廠房Royal Chicken，計劃產能每年1億隻禽鳥。在9月嘅時候收購羅馬尼亞的Elit SRL及Vericom SRL， 取得其肉製品市場的領導地位。綜合去講，萬洲國際已經係全球嘅領先肉食家禽類品牌之冠，自然係基金愛股啦！
公司九個月業績都做得幾好，營業額為162.85億美元，同比增長3.2%，經營利潤為13億幾美元，同比增長7.6%，若果唔計生物公允價值調整及本期間內因再融資而產生的非經常性債務清償費用7000萬美元及其相關稅項影響2600萬美元，公司基礎利潤為8.23億美元，較比較期間增長11.1%。整份業績睇都穩定增長，呢啲股岩曬基金胃口，亦都好啱小炒王口味。
去返稅改，市場普遍預期會提升公司盈利9%，咁萬洲美國市場收入佔企業總收入57%左右，當一半嘅話，都帶動公司增長幾個%，加埋自身嘅自然增長，小炒王預計萬洲明年都係雙位收嘅增幅，咁大嘅企業裡面，有咁嘅增長已經好唔錯， 就好似大型基金咁，每年若有10%增長已經超級唔錯，所以小炒王相信萬洲會係市場個杯茶，相信應該可以一級一級升上去。
睇返技術走勢先，公司染藍後爆過上8.65之後回調，近日都重拾升勢，執筆前一日報8.39元，較52周高位8.65差5%唔到，小炒王覺得短期內可以突破到8.65呢個位，然後再上破，簡單講係坐九望十。小炒王返港後第一隻心水股，萬洲國際，希望同大家一齊贏大錢。
不問價追 - 小炒王梁心欣 舊文
來源 source: http://www.winmoney.hk
