【股場解密】中國玻璃夠低殘炒重估（歐陽風）（JAN 10）
2018-1-10 9:00:32
港股慢牛市況持續，雖然指數連續11日上升，但感覺上並不見得市況很瘋狂，論指數升幅更加是感覺偏弱。這種市況炒股，要不一早揀定一批心水股等輪流爆上，要不就快手快腳短炒，不然周一買落一批內
房與資源股，轉眼又由賺變蝕。
資源股中，個人最睇好能源股，皆因國際油價升至現水平，好多內地油股、煤股才剛剛上升，這些股份包括中石油（00857.HK）及中石化（00386.HK），此兩股由於市值大兼街貨多難炒起，故此股價在去年的升浪中未見出色，但是現在講緊是資金來華炒入摩，這些估值廉宜的大市值股一定可以獲外資盤承接，有很大追落後價值。
至於其他資源股，玻璃股其實相當之強勁，信義玻璃（00868.HK）兩星期升了廿多巴仙，同系信義光能（00968.HK）更加3個星期升了30%，而且幾乎日日以陽燭收，反映有盤刻意將股價造上。
炒落後可以留意中國玻璃（03300.HK），去年底曾經單日被掃高49%，由0.73元炒上至1.09元，即日收0.99元，經過幾日回吐，現在股價已跌回0.85元，即使再跌亦只是跌回0.73元的起步位，呢個位代表公司股價過去一年仍然係跌，去年底公司股價都係0.82元附近。
呢輪資源股係炒產品價格上升，既然信義一門雙傑都升得咁誇張，無理由中國玻璃唔跟估值重估，呢隻落後股勝在夠平夠殘，但唔會係一線基金經理之選，故此趁低買少少博跟炒最適合。
股場解密 - 歐陽風 舊文
來源 source: http://www.winmoney.hk
