中環在線 - 李華華 2018年1月29日
中環在線：
工人今抗議美高梅肥上瘦下
■「美獅美高梅」開幕一再延期，美高梅員工亦預告今日於新項目門口遊行。
美高梅（2282）近期似乎處於風頭火勢。原定今日開幕的新路氹項目「美獅美高梅」再度延期後，點知咁啱得咁蹺，美高梅員工同一日就話要喺新項目門口遊行，質疑公司「肥上瘦下」，要為基層員工爭取花紅。
新澳門博彩員工權益會，日前已經向美高梅CEO簡博賢發出公開信，質疑公司發放花紅的比例不公平。信中提到，值班經理以上的高級職員舊年出咗3個月或以上花紅，但一些基層員工，包括保安部、工程部、餐飲部同部份文職人員等只係得一個月。博彩部都係咁，區域經理、監場主任、莊荷又係得一個月花紅。
高層照出花紅基層乜都冇
封信就話，美高梅今年再差啲，高級職員一切照舊，但區域經理、監場主任、莊荷連一份都沒有，擺明肥上瘦下咁話。搞到員工非常唔妥公司，要走出嚟遊行，爭取所有員工每年出兩個月花紅。
咁又難怪嘅，舊年賭股回勇，金沙（1928）啱啱上星期先公佈，所有做夠一年的員工都有一個月花紅，人有我無，員工梗係嘈啦。舊年銀娛（027）都係因為花紅加上風災善後問題，引來員工示威，好彩最後提早派獎勵股份拆掂，睇嚟博彩企業要多啲同員工溝通了。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.finance.appledaily.com
