智取大市：尋找逆市升好股
■建滔積層板主席張國華（左二）及董事總經理張國強（左一）。資料圖片
大藍籌股、強勢股回吐，與此同時公用股向上，市場情緒同資金流出現短暫改變，如果港股能夠短暫回穩，似乎恒指都唔會直線爆升，較大機會回復慢牛狀態，說好的急升見頂，又係未有耐出現。
跌市反而係留意股
票嘅好機會，原因係更容易察覺強勢板塊嘅存在，例如跌市靜雞雞逆市升嘅仲有睇頭。第一隻係建滔積層板（1888），連續5日升市錄陰燭，噚日就逆市升近2%，發放「跌夠啦」嘅宣言之餘，唔覺唔覺高位做咗個杯柄形態，多咗個中長線利好嘅訊號。
建滔板主要做覆銅面板，簡單講係大家成日見到嘅電腦底板，大概係未計半導體裝嵌前嘅半製成品，近年用得最多係手機、電腦、家電、汽車等等，以為近期手機行業進入小低潮、加上汽車股股價已盡反映增長前景之際，建滔板股價都受壓？實情係股價距離高位不遠。
建滔板之前公佈盈喜，預計舊年純利增長超過九成，即每股盈利至少1.233元，市盈率約11倍。對於呢隻周期性工業股嚟講，11倍PE本來唔算好平，但做得覆銅面板龍頭，一定受惠經濟升級潮，估計今年會繼續好景，股價未盡反映前景，長遠自然有計。
晉佳
http://fb.com/advanceguy1
本欄逢周一、三、五刊出
晉佳
智取大市 - 晉佳 舊文
來源 source: http://hk.finance.appledaily.com
