財智語陸：零售股的加價能力
■麥當勞巨無霸嘅售價，過去十年間，加價54%。資料圖片
新一年係各大企業加價旺季，麥當勞、香港迪士尼，以至香港郵政等，都先後宣佈加價。加價從來唔係壞事，因為通縮一定比通脹難搞，日本就係例子，但大前提係普羅大眾人工有得加。
翻查資料，麥當勞巨無霸2007年賣13
.8元，𠵱家賣21.3元，升幅54%。根據統計處數據，本港非經理級及非專業僱員嘅名義工資指數，由2007年第三季嘅153.5，升至2017年第三季嘅227.1，升48%。單睇賬面，本港低層員工近十年間工資加幅唔細，但仍略為跑輸巨無霸價格期內升幅，意味港人實質購買力十年間冇升過甚至略跌。
港人人工長期追唔上通脹，因此分析員講親消費股，都十分強調公司是否有加價能力，尤其是喺店舖加租周期即將來臨之下。
有房地產及零售業分析員預測，香港店鋪租金經歷過往三年低潮期後，今年會再度上升，事關舖租一般三年為之一個周期，內地旅客數目回升及環球經濟好過預期下，商場今年應該會喺加租方面更為進取。分析員預計收租股今年表現唔會太差。
筆者就關心店舖能否成功將加租壓力轉嫁予消費者，否則快餐股及其他本地必需品消費股，經營環境只會因加租而進一步惡化。另外，隨住美元再現弱勢，推動人民幣由跌轉升，相信亦會加劇必需消費品行業嘅入貨成本，不利本地必需品消費股。
陳永陸
獨立股評人
本欄逢周一、五刊出
陳永陸
財智語陸 - 陳永陸 舊文
來源 source: http://hk.finance.appledaily.com
