基金開工爆升浪
2018年01月03日
港股2018年開局，爆升咗接近600點。雖然陸羽仁本來都估新年港股應該會造好，都無諗過會一日就爆升咁多，原因相信係部份基金經理係年結前沽咗貨，鎖定利潤，返嚟開工重新入番市，於是造成大升浪。
恒指有機會再跑贏美股
去年12月港股埋年結前，出
現先跌後穩走勢，12月頭個市有回吐，臨到最後兩個交易日就回升，收番係接近30,000點前。呢個現象相信係港股去年大升，基金經理早已賺夠數，去到12月人心較弱，基金經理有啲腳震，一見個市回，為免埋門撻Q，就會先沽部份股份套現，確保自己份花紅唔受影響，係12月個市軟軟地的原因。
昨日放完元旦假開局，由於今年市場普遍都係睇至少上半年仲係好市，所以大家都買番啲貨，一湧之下就將指數推咗去10年新高。
以港股昨日升幅咁勁，好大機會超過外圍表現。若然係咁，就有樣嘢可以思考，就係港股會唔會再跑贏美股呢？睇番幾年前港股一度跑輸美股，但去年全年埋尾，美國杜指升咗25.1%、代表科技股的納指升咗28.2%，恒指就升咗36%，不止好過美國，基本上冠絕全球主要股市，主要係炒落後。如果按照呢個表現，咁港股今年仲有機會繼續炒落後。
聽完陸羽仁咁講，有中環茶友就話，佢過年前基本上都睇好後市，但無乜心水買乜股好，所以最終無郁手。昨日恒指雖然大升，但都有唔少股份不升反跌，所以揀股都係一個問題喎。照昨日大市表現，上升股份唔少係去年當炒強勢股好似騰訊(700) ，佢升2.9%，多過大市升幅1.9%，估計咁係因為呢輪爆升係基金經理補貨，新局就加番碼，主要加騰訊呢類基金愛股。估計基金呢輪買貨可能持續一輪短時間，買完一浸就會停一停手，股市略靜會有啲回吐，如果到時指數一有回調幾百點，都可以考慮上車買嘢。
至於揀乜嘢板塊，都又係要睇番究竟係「投機的我」、抑或「投資的我」。若然係「投資的我」，可以諗吓買番啲穩陣，有數計嘅股，好似內資銀行金融，或者無大升的巨型內房，買呢啲股唔會發達，但勝在風險細啲。若然係「投機的我」，擺明係跟紅頂白，自然係繼續炒吓科技呢類強勢股，有人嫌佢地大價，加大槓桿去炒，咁就係高風險，高回報，要自己執生。
希瑪眼科 股東有來頭
睇番大市，愈升愈有並以全 日高位收市，收報30515，升596點，為5年來最佳開局。國企指數收報12068，上揚359點，成交金額1268億元。多隻藍籌股帶領大市升勢，滙控(005) 收升1.7%報81.3元，創逾3年新高；友邦(1299) 升1.5%收報67.65元，兩隻藍籌金融股合共貢獻恒指90點升幅。港交所(388) 收升4.3%報250.2元，貢獻恒指39點升幅。騰訊(700) 創逾一個月高位，收升2.9%報417.8元，推高恒指83點。
假後濠賭股失動力，澳門去年12月份博彩收入226.99億澳門元，按年上升14.6%，差過市場預期，銀娛(027) 跌4%收報60.2元；金沙中國(1928) 跌2%收報39.5元，相信呢個板塊都要抖抖，等差不多過農曆年先算。
除了上市公司，新股嚟緊話題股係隻希瑪眼科醫療(3309) 。呢間公司搶眼球係公司主席林順潮，佢政商界人脈強勁，三位基石投資者都有來頭，林順潮係記招介紹話，當中馬化騰存在合作機會，公司有意大力拓展中國市場，互聯網為市場發展趨勢，而趙勇就熟悉北京市場，至於邢李㷧，就在連鎖店拓展方面有豐富經驗，可為公司提供啟示指導。
陸羽仁
金融High Tea 舊文
來源 source: http://hdfin.stheadline.com
